Հայաստանի ձեռք բերած նոր զինատեսակների 90 տոկոսը կիրառական չէ․ Արշակ Կարապետյան

«Ի՞նչ է նշանակում՝ զենք գնել։ Դա այն չէ, որ գնես «Լեոպարդ» տանկ, եւ ամեն ինչ արդեն լավ է։ «Լեոպարդ» տանկի կիրառության սկզբունքները ռազմական գործողություններում մի բան են, «T 72» տանկի կիրառության սկզբունքները՝ այլ։ Կազմերի պատրաստություններն էլ են տարբեր։ Տեխնիկական սպասարկումը՝ նույնպես»,- այսօր կայացած մամուլի ասուլիսում, պատասխանելով Հայաստանի կողմից այլ երկրներից, մասնավորաբար՝ Ֆրանսիայից զենք-զինամթերք ձեռք բերելու մասին հարցին, պատասխանեց «Համահայկական ճակատ» կուսակցության ղեկավար Արշակ Կարապետյանը։ Նա նկատեց՝ ԶՈՒ վերաֆորմատավորումը տասնյակ տարիներ է պահանջում, դա մեկ-երկու օրվա գործ չէ՝ մեղադրելով ՀՀ պաշտպանական գերատեսչության ղեկավարությանը ռազմական գործից անտեղյակ լինելու մեջ։ Նա հիշեց, որ Հայաստանում իշխանության եկած մարդիկ նույնիսկ երկտարյա պարտադիր զինծառայություն չեն անցել ու նրանք պոպուլիստներ են։ Ավելին, Արշակ Կարապետյանի տեղեկություններով, վերջին շրջանում Հայաստանի ձեռք բերած զենք-զինամթերքն 90 տոկոսով կիրառության ենթակա չէ՝ տարբեր պատճառներով։ Որոշները՝ զուտ տեխնիկական, քանի որ գնվել է մի զինատեսակ, որի կիրառության համար այլ փամփուշտներ են պետք, այլ ստանդարտների, որոնք անհամեմատ ավելի թանկ են, քան ռուսական համանուն զենքերը։ Իր տվյալներով՝ Հայաստանի տնտեսությունը լավ վիճակում չէ․ անցած կիսամյակում տնտեսական ցուցանիշները էականորեն նվազել են․ «Ինչպե՞ս են ձգելու՝ չգիտեմ, կտեսնենք»։

Ըստ Արշակ Կարապետյանի՝ հայկական բանակն ամերիկյանի վերափոխելու արդյունքում՝ «յուրաքանչյուր կրակոցը ոսկյա է դառնալու»։ Նա հեգնեց՝ եզակի բանը, որ բանակի համար արել են ՀՀ գործող իշխանությունները, իրենց կառավարման 7 տարիների ընթացքում, ծառայությունից խուսափելու նոր սողանցքներ գտնելն է։