Ցեղասպանությունը ժխտող ֆրանսիացուն «վիրավորած» Արա Թորանյանին Փարիզի դատարանն արդարացրել է

Փարիզի դատարանն արդարացրել է «Nouvelles d’Arménie» լրատվական կայքի գլխավոր խմբագիր Արա Թորանյանին՝ Հայոց ցեղասպանության փաստը ժխտելու համար ֆրանսիացի հետազոտող Մաքսիմ Գաուինին վիրավորելու գործով: 2017-ի հոկտեմբերին Գաուինը, որը ֆինանսավորվում է թուրքական վերլուծական մի կենտրոնի կողմից, դատական հայց էր ներկայացրել Արա Թորանյանի դեմ՝ զրպարտության և լրատվամիջոցներում հրապարակային վիրավորանքի հոդվածով: Պահանջում էր նյութական փոխհատուցում: Որպես մեղադրանք ապացուցող փաստեր ներկայացրել էր Nouvelles d’Arménie-ի 2013-ի և 2014-ի նյութերը, որոնցում ինքը համեմատվում է Հոլոքոսթը հերքող հայտնի Ռոբերտ Ֆորիսսոնի հետ: Պարբերականը Գաուինին ներկայացրել էր նաև որպես թուրքական ֆաշիզմի հավատարիմ ծառայող, քանի որ հետազոտողը հայտարարել էր, թե 1915-18-ին աքսորվող հայերին ճանապարհին լավ կերակրել են, լավ են վերաբերվել աքսորի ամբողջ ընթացքում և նշանակված վայր հասնելուց հետո: Այժմ դատարանն արդարացրել է Թորանյանին՝ նրա գործողություններում հանցավոր որևէ տարր չհայտնաբերելով: Դատական նիստի ավարտից հետո Թորանյանը հայտարարել է «Հայոց ցեղասպանության փաստը հերքող տխրահռչակ մարդու նկատմամբ տարած հաղթանակի մասին»: