Զախարյանին կհետեւեն եւս երկուսը. ի՞նչ խնդիր է լուծում Սերժ Սարգսյանը

Կառավարության ձևավորման կադրային քաղաքականության դիտորդի կարգավիճակից Սերժ Սարգսյանն անցնում է այն իր <<ձեւով>> վերաձեւելու, կադրային նոր շարժ տնօրինելու բոլորովին նոր կարգավիճակի: Օրեր առաջ կառավարություն գործուղվեցին դաշնակցական երեք նախարար, որոնց թեկնածության վերաբերյալ համաձայնությունը կայացվել է բացառապես Սերժ Սարգսյան-Հրանտ Մարգարյան բազմակի առանձնազրույցներում: Հայտնի դարձավ նաեւ, որ էներգետիկայի եւ բնական պաշարների արդեն նախկին նախարար Երվանդ Զախարյանն իր աթոռը հանձնել է Վերահսկիչ պալատի նախագահի նախկին տեղակալ Լեւոն Յոլյանին: Մեր տեղեկություններով եւս երկու փոփոխություն կլինի: Կամ այլ կերպ ասած՝ Հովիկ Աբրահամյանի կադրերը կհեռացվեն  ու կառավարություն կմտնեն Սերժ Սարգսյան <<մարդիկ>>: Յոլյանը նախագահի ամենամտերիմներից ու ամենասիրելիներից է, վերջին տարիներին մամուլը հաճախակի էր քաղաքական թռիչքներ ապահովում Լեւոն Յոլյանի համար, այդ հավանականությունը հատկապես մեծացավ ՎՊ հայտնի ու չարաբաստիկ 2012-ի զեկույցից հետո, երբ Իշխան Զաքարյանի նկատմամբ բացահայտ նախատիքներ ներկայացրեց Սերժ Սարգսյանը ու ժամերի հարց էր համարվում նրան Յոլյանով փոխարինելու խնդիրը: Յոլյանը բարձր պաշտոն չստացավ, բայց շարունակեց մնալ նախագահի բարձր հովանու ներքո: 2012-ին, ի զարմանս շատերի, անկուսակցական Յոլյանին նախագահը գործուղեց ՀՀԿ նախընտրական շտաբ՝ տեղակալի պաշտոններից մեկում : Շախմատի ֆեդերացիայի նախագահի հայտնությունը շտաբում փորձագետները գնահատեցին  Սերժ Սարգսյանի անձնական ներկայություն ու վերահսկողություն շտաբում: Նա նաեւ հանրաքվեի շտաբի պետի տեղակալներից  էր, հիմա Հովիկ Արգամիչի կառավարության անդամ: Մինչդեռ Հովիկ Աբրահամյանի կառավարության կազմը իսկզբանե հիշեցնում էր մինչև 2007-08 թվականների կառավարությունը, որտեղ Հովիկ Աբրահամյանը փոխվարչապետ էր, իսկ նախագահն էլ Ռոբերտ Քոչարյանն էր: Նույն Զախարյանը քոչարյանական <<կադրի>> հռչակ էր վայելում, ձախողված նախարար, որի վերանշանակումը վարկաբեկման իր մասնաբաժինն ունեցավ ներկայիս վարչապետին թիրախավորելու հարցում: Սերժ Սարգսյանը հայտարարեց, թե Հովիկ Աբրահամյանին լիակատար ազատություն է տրվում կադրային քաղաքականության հարցում, շատ ժամանակ չի անցել ու նախագահը, փաստացի, Հովիկ Աբրահամյանին զրկում է կադրային քաղաքականության ազատությունից եւ կառավարություն գործուղում յուրայիններին՝ ամրապնդելով սեփական իշխանության հիմքերը ու լուսանցք մղելով Աբրահամյանին: Թեպետ շատ զարմանալի է, սահմանադրական երկու ժամկետները գրեթե սպառած ու վերջնագծին մոտեցող ՀՀԿ ղեկավարի քայլերը այն համատեքստում, որ ինքն անձամբ է հայտարարել, թե այլեւս երկրի կառավարման ղեկավար պաշտոններից եւ ոչ մեկին  չի հավակնում: Այսօր Հովիկ Աբրահամյանի կառավարության որոշ անդամների փոփոխության շուրջ քննարկումները  հեռու չեն իրականություն դառնալուց: Փաստն այն է, որ վարչապետն առանձնապես յուրայիններ չունի գործող կառավարությունում՝ բացի թերեւս Արփինե Հովհաննիսյանից ու բիզնես պարտնյոր Սերգո Կարապետյանից, ու թեպետ Դավիթ Հարությունյանի ու Աբրահամյանի մտերմության մասին է խոսվում, բայց բոլորը գիտեն, որ Հարությունյանը երբեք <<սվոյ>> չի դառնում: Անի Սահակյան