Պետպատվերի շրջանակում սրտի ստենտավորման վիրահատության գինը

Կենտրոնացված գնումների շնորհիվ սրտի ստենտավորման գումարը պետպատվերի շրջանակում 1 մլն 80 հազարից կդառնա 700 000 դրամ: Այս մասին այսօր տեղեկացրել է ՀՀ առողջապահության նախարար Լևոն Ալթունյանը: «Պետպատվերի շրջանակում սրտի ստենտավորման գումարի նվազեցումը հնարավոր է դառնում կենտրոնացված գնումների հաշվին: Ստենտը ներկայում ձեռք է բերվում 250-400 եվրոյով, շուտով մեզ հնարավորություն կընձեռվի նույն որակի ստենտը ձեռք բերել շատ ավելի մատչելի գնով: Ստենտները ձեռք կբերենք 3 մատակարարից, որոնք ներկայում մատակարարում են շուկայի մոտ 85-91 տոկոսին: Մարդիկ կարող են համոզված լինել, որ բոլոր ստենտները Հայաստանում ձեռք են բերվելու այդ նույն խոշորագույն երեք մատակարարներից»- մանրամասնեց նախարարը: Նախարարության հաշվարկներով՝ ստենտի ինքնարժեքը կազմում է մոտ 620 000 դրամ: Հաշվարկների փոքր-ինչ տատանումների հաշվին որոշվել է ստենտավորման գինը սահմանել 700 000 դրամ: Նոր գնային համակարգի կիրառումը կախված է նրանից, թե որոշումն ինչքան ժամանակում կանցնի բոլոր պաշտոնական օղակներով: