Ադրբեջանական ապտակ Մոսկվային
Ռուսաստանի ԱԳՆ-ը չի ստացել Ադրբեջանից հաստատում՝ Գեորգի Զուևին նոր դեսպան նշանակելու հետ կապված։ Այս տեղեկությունը հայտնվեց ադրբեջանական կայքերի փոխանցմամբ, որոնք էլ հղում էին կատարում ՌԴ ԱԳՆ-ի սեփական աղբյուրներին։ Նշենք, որ համաձայն դիվանագիտական հարաբերություններին առնչվող կանոնների՝ դեսպանի նշանակումից առաջ ընդունող կողմից հայցում են ագրեման (համաձայնություն)՝ այսինքն՝ հավատարմագրերի հանձնման նախնական համաձայնություն։ Ստացվում է, որ Ադրբեջանը հրաժարվել է ագրեման տրամադրել Գեորգի Զուևին, իսկ պատճառն, ըստ ադրբեջանական ԶԼՄ-ների՝ նրա վառ արտահայտված հայամետ դիրքորոշումն է։ Ավելի վաղ Զուևի թեկնածությունը հաստատել էր ԱՊՀ հարցերով Պետդումայի կոմիտեն։ Զուևը հանդիսանում է փորձառու դիվանագետ և ներկայում զբաղեցնում ՌԴ ԱԳՆ կադրերի բաժնի փոխտնօրենի պաշտոնը։ Նոյեմբերի 27-ին հայտնի դարձավ, որ Ռուսաստանի նախագահ Վլադիմիր Պուտինը հետ է կանչել Վլադիմիր Դորոխինին Ադրբեջանում դեսպանի պաշտոնից։ Դորոխինը նշանակվել էր այդ պաշտոնում 2009թ. փետրվարի 24-ին: Մոսկվան շահագրգռված է Ադրբեջանի կայուն, կանխատեսելի ու բարգավաճ զարգացմամբ, երեկ այս մասին հայտարարել է Ռուսաստանի դեսպան Վլադիմիր Դորոխինը՝ Ադրբեջանում դիվանագիտական առաքելությունն ավարտելուց առաջ: Դեսպանը պնդել է, թե Բաքուն ևս հակված է խորացնել հարաբերությունները Ռուսաստանի հետ: «Մենք տարբեր ենք մասշտաբներով, մենթալիտետով ու մշակույթով, շատ հարցերում ունենք տարբեր քաղաքական շահեր, ու չնայած դրան՝ Ադրբեջանն ու Ռուսաստանը սովորել են լեզու գտնել միմյանց հետ»,- հայտարարել է Դորոխինն իր հրաժեշտի խոսքում: Ռուս-ադրբեջանական հարաբերություններում վերջին շրջանում որոշակի բարդություններ կարող են ի հայտ գալ: Բանն այն է, որ Էրդողանի հայտնի հայտարարությունից հետո, երբ նա նշեց, թե Պուտինի հետ քննարկել է ԼՂ հարցը, հավելեց նաև, որ Պուտինի մոտ դրական հույսեր չկան ԼՂ խնդրի արագ կարգավորման շուրջ: Սրանից ընդամենը մի քանի օր անց Երևանում նաև Ռուսաստանի արտգործնախարար Սերգեյ Լավրովը հավելեց, որ ԼՂ հակամարտության արագ կարգավորման հույս չունի: Սրանք Բաքվին ու Անկարային նյարդայնացնող հայտարարություններ էին, և հնարավոր է՝ մենք առաջիկայում ականատես դառնանք ռուս-ադրբեջանական հարաբերությունների շրջանակում որոշակի կսմթոցների ցուցադրության, իհարկե՝ առավելապես Բաքվից: Թերևս, Գեորգի Զուևին Ադրբեջանում ՌԴ նոր դեսպան նշանակելու վերաբերյալ Բաքվի արձագանքը դրանցից մեկն է: Մետաքսյա Շալունց
Հետևեք մեզ Viber-ում
