Անդրանիկ Մարգարյանի պաստառի կողքին տեղադրել Քիմ Քարդաշյանինը.Երեւանի ավագանու նիստը կրկին թեժ էր

Երևանի ավագանու այսօրվա նիստում  քննարկվում  էր  մի շարք փողոցների անվանափոխության հարցը։ Հիշեցնենք, այս հարցում ՀՀԿ խմբակցությունը միացել է ԵԼՔ-ի առաջարկներին։ «Երկիր ծիրանի» խմբակցության անդամ Մարինա Խաչատրյանն առաջարկեց  մայրաքաղաքի փողոցներում տեղադրված «Հայ մեծերը» խորագրով մեծադիր պաստառների շարքում տեղ հատկացնել նաեւ Քիմ Քարդաշյանի պաստառին: «Մենք հիշում ու մեծարում ենք մեր մեծերին,ովքեր  մեզ համար ուղենիշ են հանդիսանում ազնիվ, բարոյական, արժանապատիվ ապրելու, արարելու համար: Հազիվ թե մեկը նկատած չլինի, որ բացի ցուցատախտակներից, Երեւանի փողոցներում լայնորեն տարածված են նաեւ հայ մեծերի մասին փոքրիկ նշումներով ցուցապաստառները: Հաճելի է քայլել Երեւանով ու տեսնել քո պատմությունը կերտած մարդկանց լուսավոր դեմքերը, սակայն շատ երեւանցիների մոտ մի բնական հարց է առաջանում՝ ի՞նչ գործ ունի այդ ցուցապաստառների շարքում Անդրանիկ Մարգարյանի ցուցապաստառը:   Յուրաքանյուր հայի համար ապտակ է այդ ցուցապաստառը:Եթե մեր մայրաքաղաքում տեղադրված են ոչ միայն հայ մեծերի ցուցապաստառները, ապա մեր խմբակցությունն առաջարկում է այդ ցուցապաստառների շարքում ներառել նաեւ Քիմ Քարդաշյանի ցուցապաստառը: Նա նույնպես հայերի համար շատ մեծ գործեր է արել: Անհամեմատելի է Անդրանիկ Մարգարյանի ու Քիմ Քարդաշյանի հետեւորդների քանակը»,- հայտարարեց Մարինա Խաչատրյանը: «Ավարտեցի՞ք ելույթը ձեր»,- հոգոց հանեց քաղաքապետ Տարոն Մարգարյանը :