Մադրիդում սկանդալ է սկսվել հայերի և վրացիների միջև

Իսպանիայում նոյեմբերի կեսերից սկսած Մադրիդի վրացական համայնքի ներկայացուցիչները սկսել են սպառնալ հայկական Gayane’s ռեստորանի տերերին, քանի որ նրանց խոսքով՝ հայերն իրենց այցելուներին վրացական խոհանոցի ճաշատեսակներ են առաջարկում, գրում է rusarminfo.ru-ն: Այս մասին տեղեկացնում է armtimes.com-ը՝ նշելով, որ հայկական ռեստորանի տերերը`ամուսիններ Զարուհի Պարունակյանը եւ Անտոն Ռայչեւը, պատմել են սկանդալի մանրամասները: «Մադրիդի հայ համայնքի ներկայացուցիչներից մեկը, որի մայրը վրացի է, մեր ռեստորանի մասին հղում էր տարածել ֆեյսբուքի վրացական խմբերից մեկում, որպեսզի օգնի տեղեկություն տարածել հայկական հաստատության մասին: Հաջորդ օրն ամուսինս տեսել է, որ վրացիները նույն հղումը տարածում են` հայ ժողովրդի մասին վիրավորական մեկնաբանություններ գրելով: Պատճառն այն է, որ մեր ռեստորանի ճաշացանկում կա խաչապուրի եւ խինկալի: Ընդ որում նշված է, որ դրանք վրացական խոհանոցի ճաշատեսակներ են: Սակայն վրացիները սկսել են մեզ մեղադրել, թե մենք իրենց ճաշատեսակները հայկական ենք ներկայացնում եւ պահանջում են հանել դրանք ճաշացանկից»,- ասել է Զարուհի Պարունակյանը: Նա նաեւ տեղեկացրել է, որ սկսել են վրացիներից ռեստորանի, եւ նույնիսկ իրենց վերաբերյալ անձնական վիրավորանքներ ստանալ: Ամուսինները դրանք բոլորը հավաքել են ու ոստիկանություն դիմել: Հիմա հետաքննություն է սկսվել: Միջադեպի մասին տեղեկացվել է նաեւ Իսպանիայում Հայաստանի դեսպանատունը: