Թուրքիան ձգտում է մտնել ատոմային սուզանավեր արտադրող երկրների շարքը

Թուրքիայի ռազմածովային ուժերի հրամանատար, ծովակալ Էրջյումենթ Թաթլըօղլուն առաջին անգամ պաշտոնապես հայտնել է իրենց այն հավակնության մասին, որ մտադիր են ստեղծել միջուկային էներգիայով աշխատող սուզանավ։ Այս մասին տեղեկացնում է ermenihaber.am-ը։

Թաթլըօղլուն, միջազգային հեղինակավոր լրատվամիջոցին տված հարցազրույցում հստակեցրել է սուզանավի վերաբերյալ ծրագիրը։ «139 տարի շարունակ մեր ազգային երազանքն է եղել կառուցել անկախ դիզայնով սուզանավ։ ՄԻԼԴԵՆ-ի ավարտից հետո մենք նոր քայլ ենք անելու միջուկային սուզանավերի ուղղությամբ»։

Նշվել է, որ թուրքական ռազմածովային արդյունաբերությունը վերջին շրջանում զարգացել է ոչ միայն ազգային պահանջներին բավարարելու, այլև հնարավորինս արտաքին կախվածությունը նվազեցնելու ուղղությամբ։ ՄԻԼԳԵՄ (Milli Gemi) և ՄԻԼԴԵՆ (Milli Denizaltı) ազգային նավաշինական ծրագրերը, որոնք արդեն նշանակալի արդյունքների են հասել, նախադրյալ ստեղծել միջուկային սուզանավ նախագծելու համար։

Թուրք ռազմական փորձագետ Դևրիմ Յայլալըն, որը պաշտպանական արդյունաբերության ոլորտում հեղինակավոր վերլուծաբան է, կարծիք է հայտնել, որ նման հզորությամբ սուզանավ ունենալը Թուրքիային կարող է դասել աշխարհի այն երկրների շարքին, որոնք ի զորու են ինքնուրույն նախագծել, արտադրել և շահագործել միջուկային սուզանավեր։ Այդ երկրների թվում են ԱՄՆ-ն, Ռուսաստանը, Չինաստանը, Ֆրանսիան, Մեծ Բրիտանիան և Հնդկաստանը։

Յայլալըն նշում է, որ նախագիծն ունի ոչ միայն ռազմական կամ տեխնոլոգիական, այլև տնտեսական ու մարդկային զարգացումների կարիք։ Նման հսկայական նախաձեռնությունը, ըստ նրա, կարող է զգալիորեն բարձրացնել Թուրքիայի գլոբալ հեղինակությունը և ազդեցությունը։ Նա հավելում է, որ սա պետք է դիտարկել նաև Թուրքիայի մյուս ռազմածովային նախաձեռնությունների՝ մասնավորապես ավիակիրի կառուցման ծրագրի համատեքստում։