Բաքվի դատարանում ուսումնասիրել են Սերժ Սարգսյանի, Մովսես Հակոբյանի մասնակցությամբ տեսանյութ, հարցեր ուղղել Դավիթ Իշխանյանին

Բաքվի ռազմական դատարանում այսօր շարունակվել է արցախի ռազմաքաղաքական ղեկավարության դեմ շինծու մեղադրանքներով դատական նիստը։ Այսօրվա նիստում, ըստ ադրբեջանական լրատվամիջոցների, ուսումնասիրվել է Մարտունիի շրջանի ազատագրման վերաբերյալ մի տեսանյութ։ Դրանում երևում են Սերժ Սարգսյանն ու Դավիթ Իշխանյանը։

Տեսանյութի ուսումնասիրությունից հետո պարզվել է, որ Սերժ Սարգսյանը ժամանել է զորամասեր ստուգելու։

Տեսանյութում Մոնթե Մելքոնյանը հաշվետվություն է ներկայացնում Սերժ Սարգսյանին՝ Սարգսյանն ասում է նրան. «Մենք հիմա չենք խոսում հրադադարի մասին։ Մենք խոսում ենք հարձակողական գործողությունների և նոր տարածքների գրավման մասին»։

Տեսանյութում նաև երևում է տարածքի զննում, որտեղ Սերժ Սարգսյանը զրուցում է Դավիթ Իշխանյանի հետ։

Այս տեսանյութի առնչությամբ դատարանում հարցեր են ուղղել Բաքվում գերության մեջ գտնվող Դավիթ Իշխանյանին։ Պատասխանելով դատախազների հարցերին՝ Դավիթ Իշխանյանը նշել է, որ հիշում է Սերժ Սարգսյանի տարածք այցի նպատակը։

Ըստ ադրբեջանական լրատվամիջոցների մեկնաբանման՝ Իշխանյանն ասել է. «Նրանք ժամանեցին իմ գումարտակ և ծանոթացան դիրքերում տիրող իրավիճակին։ Տեսանյութում են Սերժ Սարգսյանը, Մոնթե Մելքոնյանը, Մովսես Հակոբյանը: Այդ ժամանակ նա Մոնթե Մելքոնյանի տեղակալն էր: Տեսանյութում նկարահանված մեկ այլ անձ իմ աշխատակազմի ղեկավար Արամայիս Կարապետյանն է»: