ԱՄՆ-ում հայր ու որդի Ազատյանները ենթարկվել են շնաձկան հարձակման

Սպիտակ շնաձուկը Կալիֆորնիայի Մոնթերեյ նեղուցում հարձակվել է այնտեղ լողացող 25-ամյա Գրիգոր Ազատյանի վրա:   Daily News-ը հայտնել է,որ  շնաձկան հարձակման մասին անմիջապես իմացել է նրա հայրը՝ Արմեն Ազատյանը, ով լսել է որդու սահմռկեցուցիչ ճիչը:Արմենը պատմել է, որ անձամբ ականատես չի եղել հարձակման պահին, սակայն լսելով որդու ձայնն անմիջապես հասկացել է, որ ինչ-որ աղետալի բան է տեղի ունեցել:«Այդ պահին ասես կայծակը հարվածեց: Սարսափելի էր, նրա մկանները պոկված էին: Սակայն ես չէի կարող ինձ խուճապի մատնվելու շքեղություն թույլ տալ, բղավել կամ լինել էմոցիոնալ: Ես ստիպված էի կենտրոնանալ և անել հնարավոր ամեն բան օգնելու որդուս»,- պատմել է Ազատյանը: Հայր ու որդի Ազատյանները որսորդությամբ են զբաղվում ստորջրյա աշխարհում, լուսանկարում ջրային բնությունը, ձկնատեսակներին, հենց լուսանկարելիս է Գրիգոր Ազատյանը նկատել շնաձկանը, չի հասցրել զգուշացնել հորը, երբ շնաձուկն արդեն բռնել է նրա ոտքից: Մինչ նրանից ազատվելը, սպիտակ շնաձուկն հասցրել է 3 անգամ կծել նրան` 2 անգամ ոտքից, 1 անգամ` գոտկատեղից ներքեւ: Գրիգորի աջ ոտքը ամբողջությամբ հոշոտված է եղել, արնահոսել է, տղան հասցրել է հարվածել շնաձկան գլխին ու ազատվել նրա երախից, հասել մինչեւ նավակը ու քանի որ կապի բոլոր միջոցները չեն կարողացել փրկարար ալիք որսալ, նրանք լողալով մոտեցել են ափին ու օգնություն խնդրել: Գրիգոր Ազատյանն արդեն 2 անգամ վիրահատվել է, առջեւում նրան սպասվում է եւս մեկ վիրահատություն, սակայն հոր` Արմենի խոսքերով, ամենակարեւորը որդու ողջ լինելն է: