Այ տնաշեններ, ընդունեք, որ ԵՄ հետ ստորագրած փաստաթուղթը Հայաստանի հաղթանակն էր. Աշոտյան

Այսօր խորհրդարանում ԵՏՄ-ից դուրս գալու նախագծի հանրային լսումների ժամանակ ՀՀԿ-ական պատգամավոր Արմեն Աշոտյանը ասաց, որ «Ելք» խմբակցության նախաձեռնության Եվրասիական տնտեսական միության հետ շաղկապված ենթատեքստը միայն տնտեսական չէ, և այդ նախաձեռնության տակ կա քաղաքականություն, այդ թվում` գլոբալ քաղաքականություն: «Այ տնաշեններ, ընդունեք, որ ԵՄ հետ ստորագրած փաստաթուղթը Հայաստանի հաղթանակն էր, հաջողության պատմությունը: Հակառակ պարագայում ձեզանից շատերն այդ օրը Ֆեյսբուքում հրճված չէին լինի: Ասեք, որ ստացվել է, մենք զգացել ենք, որ դուք դա գիտեք: Սակայն ցանկացած անդամություն վերազգային կառույցի բերում է ինքնիշխանության կամավոր որոշակի զիջում: Նույն ԵՄ պետությունները շատ ավելի մեծ սուվերեն իրավունքներ են պատվիրակել Բրյուսելին»,- հայտարարեց Ա.Աշոտյանը: Նա նշեց, որ Արևելյան գործընկերության գագաթնաժողովում ընդունված հռչակագրում Ռուսաստանի անունը չի հիշատակվում: Աշխարհը փորձում է դուրս գալ հակամարտող քաղաքականությունից, այդ գագաթնաժողովը ոչ մի հակառուսական լուրջ քաղաքական հարված չի պարունակել: «Սա ձեզ ոչնինչ չի հուշո՞ւմ: Իներցիայով մենք այստեղ հակառուսական բաներ ենք լսում մեր նման կողմնորոշում ունեցող մարդիկ, իսկ իրականության մեջ աշխարհի հետևից չեք հասցնում, հարգելիներս»,- ասաց նա: