Մենք որևէ լուծում չենք առաջարկելու կամ պարտադրելու Հայաստանին. Պյոտր Սվիտալսկի
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին այսօր անդրադարձել է ՀՀ-ԵՄ համաձայնագրի ստորագրմանը՝ նշելով, որ այն հնարավորություն է տալիս շարունակել ՀՀ-ի հետ համագործակցությունն էներգետիկայի ոլորտում։ «ԵՄ-ն կտա աջակցություն Հայաստանին՝ կանաչ էներգետիկայի անկախ աղբյուրներ ստեղծելու, էներգետիկ շուկան լիբերալիզացնելու ուղղությամբ, ավելի մատչելի էներգիա ունենալու հարցերում: ԵՄ-ն տարիներ շարունակ աջակցել է Հայաստանին, որպեսզի Մեծամորի ատոմակայանն անվտանգ դառնա և պատշաճ կերպով աշխատի: Համաձայնագիրը ՀՀ-ի համար վտանգ պարունակող որևէ դրույթ չունի, հակառակը՝ դա միայն վերահաստատում է մեր համագործակցության պարտավորությունը։ Բոլոր ռեակտորներն ինչ-որ գործողության ժամկետ ունեն, որի ընթացքում անվտանգ կաշխատեն, բայց պետք է նաև հաջորդ քայլին անդրադառնաք, թե հետո ինչ է լինելու։ Այնպես որ, ԵՄ-ն պատրաստ է աշխատել ՀՀ-ի հետ՝ լավ, մատչելի և արդյունավետ լուծում գտնելու ուղղությամբ։ Մի լուծում, որը ՀՀ բոլոր քաղաքացիներին դուր կգա, սա այն է, ինչ ուզում ենք ասել, և ոչ մի բան ավելի»,- համոզված է նա: Իսկ հարցին, թե ԵՏՄ-ին Հայաստանի անդամակցությունը չի՞ խոչընդոտի ՀՀ-ԵՄ համաձայնագրի իրականացմանը, դեսպանը պատասխանեց. «Մենք հաշվի ենք առնում Հայաստանի պարտավորությունները, բայց Հայաստանը պետք է որոշի, թե ինչպես է այս համաձայնագիրը ներդաշնակեցվում մյուս միությունների հետ։ Սա մեր պարտականությունը չէ, մենք որևէ լուծում չենք առաջարկելու կամ պարտադրելու Հայաստանին, մեզ համար հարցը շատ հստակ է՝ շատ բան կարող ենք անել միասին՝ գոյություն ունեցող պարտավորությունների համակարգի միջոցով։ Մյուս հարցերը հայաստանցիները պետք է գնահատեն, քննարկեն և եզրակացություններ անեն։ Եթե հայաստանիցները հույսով նայեն Եվրոպային, եթե մեզնից ավելի շատ ու ավելի արդյունավետ աշխատանքի ակնկալիք ունենան, սա իմ աշխատելու մոտիվացիան կլինի»։ Ինչ վերաբերում է համաձայնագրով ԵՄ երկրներից Հայաստանին տրվող ֆինանսական աջակցության կոնկրետ չափերին, դեսպանն ասաց, որ աջակցությունը 1 միլիարդ 17 միլիոն դոլարի կհասնի։
Հետևեք մեզ Viber-ում
