Դատական իշխանության նկատմամբ ապօրինի ճնշման հերթական փաստարկված դեպքը․ Կոչուբաև
Սահմանադրական դատարանը ՍԴՈ-1780 որոշմամբ արձանագրեց մի հստակ և անհերքելի փաստ՝ Բարձրագույն դատական խորհուրդը ապօրին է դադարեցրել դատավոր Արթուր Ստեփանյանի լիազորությունները: Այս մասին իր էջում գրել է փաստաբան Ալեքսանդր Կոչուբաևը։
Նա, մասնավորապես, նշել է. «Իրավական պետությունում, որտեղ Սահմանադրությունն ունի բարձրագույն իրավական ուժ, դատավորի լիազորությունների դադարեցումը հինգ ձայնով, երբ ԲԴԽ-ն կազմված է տասը անդամից, Սահմանադրական դատարանի գնահատմամբ հանդիսանում է հանրային ծառայության անցնելու իրավունքի և դատավորի անկախության խախտում։
ՍԴ-ն հստակ արձանագրեց՝ նման որոշումների ընդունման ընթացակարգը լրջորեն վտանգում է դատավորի անկախությունը, քանի որ ապահովում է ոչ թե օրինական, այլ քաղքական կամայական միջամտություն դատական իշխանությանը։
Այսուհետ, նմանատիպ որոշումները, ՍԴ-ի որոշման համաձայն, կարող են ընդունվել միայն ԲԴԽ անդամների ընդհանուր թվի մեծամասնությամբ, այսինքն՝ առնվազն վեց ձայներով։ Հակառակ դեպքում, դրանք հակասում են Սահմանադրությանը։
Սա լուրջ ազդակ է. դատական համակարգը ճնշման և ապօրինի միջամտության թիրախում է։ Դատավորների նկատմամբ այսպես կոչված «կարգապահական վարույթները» ոչ միայն չեն բխում իրավունքի գերակայության սկզբունքից, այլև հանդիսանում են հատուկ միջոց՝ դատական իշխանության վրա վերահսկողություն հաստատելու նպատակով։
Ժամանակն է, որ դադարեցվի դատական իշխանության թիրախավորումը։ Սահմանադրական դատարանը հստակ շեշտեց՝ կատարվողը հակասում է Սահմանադրությանը, իսկ հետևանքները վտանգում են ոչ միայն դատավորների անկախությունը, այլև ամբողջ պետական կառավարման համակարգի իրավաչափությունը»։
Հետևեք մեզ Viber-ում
