Պահպանել անցյալի տխուր իրադարձությունների հիշողությունը և թույլ չտալ դրանց մոռացությունը քաղաքական շահադիտական նպատակներով. Զախարովան՝ Հայոց Ցեղասպանության մասին

Ապրիլի 24-ը՝ Օսմանյան կայսրությունում Հայոց ցեղասպանության 110-րդ տարելիցը, հանդիսանում է 20-րդ դարի առաջին կեսի ամենաողբերգական իրադարձություններից մեկը։ ՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան ապրիլի 24-ին կայացած ճեպազրույցի ժամանակ։
Նրա խոսքերով՝ Ռուսաստանում եղբայրական հայ ժողովրդի վիշտը միշտ ընկալվել է որպես սեփական։

«Պատմական վկայությունների համաձայն՝ 1915 թվականին ռուսական կայսերական բանակի Կովկասյան բանակը, Նիկոլայ Երկրորդի կարգադրությամբ, բացելով ռուս-թուրքական սահմանը, փրկեց առնվազն 350 հազար հայ։ Մոսկվայի դիրքորոշումը այդ իրադարձությունների վերաբերյալ հայտնի է՝ այն հետևողական է և հիմնված հումանիստական ավանդույթների վրա։ Դեռևս 1915 թվականին՝ Սերգեյ Դմիտրևիչ Սազոնովի ղեկավարած ռուսական դիվանագիտության նախաձեռնությամբ, միջազգային համայնքի առաջատար անդամները կատարվածը որակեցին որպես հանցագործություն մարդկության դեմ», – նշել է Զախարովան։

Նա ընդգծել է, որ ժամանակակից Ռուսաստանը աշխարհի այն առաջին երկրների թվում է, որը ճանաչել է Օսմանյան կայսրությունում Հայոց ցեղասպանությունը։ Ռուսաստանի Դաշնության Դաշնային ժողովի Պետդուման 1995 և 2005 թվականներին ընդունել է որոշումներ, որոնք դատապարտում են 1915-1922 թվականներին իրականացված Հայոց ցեղասպանությունը։

«2015 թվականին Ռուսաստանի նախագահ Վլադիմիր Պուտինը Հայաստան կատարած այցի ընթացքում մասնակցել է զոհերի հիշատակի արարողությանը և խորին կարեկցանք է հայտնել հայ ժողովրդին», – հիշեցրել է նա։

Զախարովան նաև նշել է, որ ապրիլի 24-ին Ռուսաստանի բազմաթիվ քաղաքներում, այդ թվում՝ Մոսկվայում, ավանդաբար անցկացվում են հիշատակի բազմաթիվ միջոցառումներ՝ ոչ միայն բազմամարդ հայկական համայնքի ներկայացուցիչների, այլև տարբեր ազգերի մարդկանց մասնակցությամբ։

«Նրանց բոլորին միավորում է ցանկությունը՝ պահպանել անցյալի տխուր իրադարձությունների հիշողությունը և թույլ չտալ դրանց մոռացությունը քաղաքական շահադիտական նպատակներով», – եզրափակել է ՌԴ ԱԳՆ պաշտոնական ներկայացուցիչը։