«Իսլամական պետությունը» մոտենում է ՀՀ սահմաններին

Մեկօրյա մղձավանջ... Հատուկ հակաահաբեկչական գործողություններ, նռնակների կիրառում, ինտենսիվ հրաձգություն, արցունքաբեր գազի կիրառում, բնակիչների տարհանում... Երեկ Թբիլիսում ավարտվեց նախորդ օրվանից սկսած հակաահաբեկչական գործողությունը: Վրաստանի հատուկ ծառայությունները գրեթե մեկ օր լարված հատուկ գործողություններ էի իրականացնում, որպեսզի վնասազերծեն Թբիլիսիի Իսանիի շրջանի բնակելի շենքերից մեկում դիրքավորված ահաբեկիչներին, և փաստացի համառ դիմադրության էին հանդիպում: Հատուկ ծառայությունները նախ պնդում էին, որ զինված խմբի անդամները ահաբեկչական կազմակերպություններից մեկի անդամներն են: Հակաահաբեկչական գործողության թատերաբեմ դարձած շենքի բնակիչների վկայությամբ՝ բնակարանը, որ գրոհով վերցնել էին իրավապահները, չեչեններ էին վարձակալում: Գործողության մասին առաջին պաշտոնական տեղեկությունները հրապարակեց Վրաստանի Պետանվտանգության ծառայության մամուլի խոսնակ Նինո Գիորգոբիանին․ «Պետական անվտանգության ծառայության հակաահաբեկչական դեպարտամենտը հատուկ գործողություն է իրականացնում Թբիլիսիի Գաբրիել Սոլոսիի փողոցում: Գործողության թիրախ հանդիսացող անձինք կրակ են բացել հատուկջոկատայինների ուղղությամբ: Նախնական տեղեկությունների համաձայն՝ այդ մարդիկ Վրաստանի քաղաքացիներ չեն և ահաբեկչական կազմակերպություններից մեկի անդամներ են»: Հատուկ ստորաբաժանումների աշխատակիցները Թբիլիսիի հարավում գտնվող և առավելապես բազմահարկ շենքերով կառուցապատված Իսանիի շրջան ժամանեցին կեսգիշերից հետո` չկարողանալով սակայն արագորեն վնասազերծել զինված խմբի անդամներին: Առավոտյան կողմ հակաահաբեկչական գործողության անցկացման վայր ժամանեցին հավելյալ ուժեր` «Կոբրա» մակնիշի զրահամեքենայի ուղեկցությամբ: Դա, սակայն, նույնպես չփոխեց հակաահաբեկչական գործողության ընթացքը՝ զինված խմբի անդամները շարունակում էին կատաղի դիմադրություն ցուցաբերել: Ծանր դիմադրությունից ժամեր անց միայն, տեղեկություն ստացվեց, որ Թբիլիսիում ծավալված հակաահաբեկչական գործողությունն ավարտվել է: Վրաստանի հատուկ ծառայություններից մոտ 19 ժամ պահանջվեց Թբիլիսիի Իսանիի շրջանի բնակելի շենքերից մեկում դիրքավորված ահաբեկիչներին վնասազերծելու համար: Հատուկ ծառայությունները պնդում էին, որ Թբիլիսիի հարավում գտնվող և առավելապես բազմահարկ շենքերով կառուցապատված Իսանիի շրջանում դիրքավորված զինված խմբի անդամները պատկանում են ահաբեկչական կազմակերպություններից մեկին: Հարևանների պնդմամբ, բնակարանը, որը ժամեր շարունակ փորձում էին գրոհով վերցնել իրավապահները, չեչեններ էին վարձակալում: Ողջ օրվա ընթացքում Իսանիում դիրքավորված զինված խմբի անդամները շարունակում էին կատաղի դիմադրություն ցուցաբերել: Նրանց վնասազերծումը հնարավոր դարձավ առնվազն երկու գրոհների, ինչպես նաև մի շարք զինատեսակների` այդ թվում զրահամեքենայի և նռնականետերի կիրառումից հետո միայն: Գործողության ընթացքում Գաբրիել Սոլոսի, 156 հասցեում գտնվող շենքի առնվազն երկու բնակարաններ ամբողջությամբ այրվել են: Զինված խմբի անդամների ճակատագրի մասին տեղեկություններն այս պահին հակասական են: Imedi հեռուստաընկերության տվյալներով, զինյալներից մեկը ձերբակալվել է, ևս երկուսը տարբեր աստիճանի վնասվածքներով տեղափոխվել են հիվանդանոց: Rustavi 2 հեռուստաընկերության եթերում հեռարձակված կադրերում հստակ երևում է, որ շենքի բակում սպանված տղամարդու դիակ կա: Հեռուստաընկերության պնդմամբ, դա ահաբեկիչներից մեկն էր: Գրեթե մեկ օր շարունակված գործողության ընթացքում հատուկջոկատայինները ևս կորուստներ կրեցին: Պաշտոնական աղբյուրները հաստատեցին, որ ահաբեկիչների հետ փոխհրաձգության ընթացքում վիրավորվել էր հատուկ ջոկատի մարտիկներից մեկը: Երեկոյան հայտնի դարձավ, որ հատուկջոկատայինը առանց գիտակցության գալու մահացել է: Վրաստանի հատուկ ծառայությունները առայժմ չեն բացահայտում սպանված ոստիկանի ինքնությունը, հայտնի է միայն, որ նա 41 տարեկան էր: Ինչ վերաբերում է ահաբեկիչներին, ապա վրացական լրատվամիջոցները, իրավապահ մարմիններում իրենց աղբյուրները վկայակոչելով, հիմնականում «չեչենական հետքն են» մատնանշում: Թբիլիսյան «Կվիրիս Պալիտրա» թերթի պնդմամբ, ահաբեկիչները «Իսլամական պետություն» խմբավորմանն անդամակցած չեչեններ են: «Վրաստանի տարածքում այդ մարդիկ գտնվում էին առանց օրինական փաստաթղթերի», -պնդում է թերթը: Ռուսաստանյան «Ինտերֆաքսի» տեղեկություններով, իրավապահներին հաջողվել է պարզել ահաբեկիչների վարձակալած բնակարանի սեփականատիրոջ ինքնությունը: Գործակալության պնդմամբ, բնակարանը պատկանում է առավելապես չեչեններով բնակեցված Պանկիսի կիրճում գտնվող Դուիսի գյուղի բնակիչ Ասլան Ջաբրաիլովին: «Մի քանի ամիս առաջ Ջաբրաիլովը բնակարանը վարձակալությամբ հանձնել էր օտարերկրացիների մի ընտանիքի: Հարևանների պնդմամբ, այդ բնակարանում մի տղամարդ էր բնակվում՝ իր երկու որդիների հետ», - գրում է «Ինտերֆաքսը»: Եթե հաստատվեն նախնական տեղեկություններն այն մասին, որ իսկապես ահաբեկիչները «Իսլամական պետություն» խմբավորմանն անդամակցած չեչեններ են, ապա, սա լուրջ մտորելու առիթ է: Ահաբեկչական խմբավորման անդամները թափանցել են ոչ միայն հայաշատ հարևան Վրաստան, այլև առավել քան երբևէ, մոտեցել են Հայաստանի սահմաններին: Մետաքսյա Շալունց