Արցախցիների չկռվելու մասին խոսքերը վիրավորում են մեր որդիների լուսավոր հիշատակը․ հերոսի մայրը՝ ՔՊ–ականներին

44-օրյա պատերազմում անմահացած հերոսի մայր Նաիրա Մարգարյանը, ով Արցախից տեղահանվել և այժմ բնակվում է Գյումրիում, պատասխանել է ՔՊ–ականներին, ովքեր հայտարարում են, թե 44–օրյա պատերազմի ժամանակ, իբր, արցախցիները չեն կռվել․

«Խոսքս ուղղված է բոլոր ՔՊ–ին, ովքեր ուրանում են ամեն ինչ։ Ես մայր եմ… մայր, որ ծնեց որդի, դաստիարակեց, մեծացրեց, օրհնեց ու ճանապարհեց Հայրենիքի պաշտպանության սուրբ ճանապարհով։

Այդ ճանապարհից իմ որդին, ինչպես շատ ուրիշներ, վերադարձավ… բայց վերադարձավ անմահացած։ Ցավով եմ լսում, երբ տարբեր պաշտոնյաներ բարձրաձայնում են, թե իբր Արցախցիները չեն կռվել, թե մենք չենք կռվել։

Այդ խոսքերը դանակի պես խրվում են մեր սրտի մեջ, վիրավորում մեր որդիների լուսավոր հիշատակը։ Մեր տղաները կռվեցին՝ իրենց արյունով պահելով ու պաշտպանելով հողը՝ մինչև վերջին շունչը։ Արցախը մենք չկորցրինք նրա համար, որ չէինք կռվում։ Արցախը կորցրինք այն բանի պատճառով, որ գործող իշխանությունը հեռու էր դիվանագիտությունից, չկարողացավ պահպանել մեր հաղթանակների արդյունքը, չկարողացավ արժանապատվորեն կանգնել մեր հերոսների թիկունքին։ Որպես զոհված զինվորի մայր՝ պահանջում եմ, որ Սգո օր հռչակվի՝ ի հիշատակ մեր անմահացած տղաների։ Եվ այդ օրը՝ սեպտեմբերի13-ին, սեպտեմբերի19-ին և սեպտեմբերի 27-ին, հրապարակվեն բոլոր հերոսացած որդիների անունները, որ ամբողջ ժողովուրդը տեսնի ու հիշի, թե ովքեր են եղել իր իրական հերոսները։ Սա մոր սրտի ճիչ է… մեր ամբողջ ազգի ցավն ու պարտքը մեր տղաների առաջ։ Թող հերոսների անունները վառ մնան, և նրանց արյունով գրած պատմությունը ոչ ոք չհամարձակի մոռանալ կամ աղավաղել»։