Հարցս մսով ճաշի մասնագետ Փաշինյանին

Սիրելի քաղաքացիներ, ձեզ ոչ միայն հարկելու են համընդհանուր հայտարարագրման ինստիտուտի ներդրումից հետո, այլ նաև դատելու են։ Այս մասին ԱԺ-ում հայտարարեց «Հայաստան» խմբակցության պատգամավոր Ագնեսա Խամոյանը։

Նա նշեց, որ ԱԺ հանձնաժողովներից մեկի նիստում ՊԿ նախագահ Էդուարդ Հակոբյանին հարցրել է, թե ի՞նչ է սպասվում մեր այն քաղաքացիներին, ովքեր հայտարարագիր չեն լրացնելու։ «Պարոն Հակոբյանը ներկայացրեց այն վարչական պատասխանատվությունը, որին ենթարկվելու է քաղաքացին։ Ասում է՝ դե մի անգամ 5-50 000 դրամով են տուգանելու, եթե նախազգուշացում է ստանում, դրանից հետո էլի չի լրացնում հայտարարագիրը, ևս տուգանք է լինելու, արդեն կրկնապատիկի չափով։ Ասում ենք՝ այսքա՞նը, պարոն Հակոբյան, ասում է այդքանը»,-պատմեց Խամոյանը։

Պատգամավորը սակայն հարցում է ուղարկել ՊԵԿ նախագահ Էդուարդ Հակոբյան՝ խնդրելով գրավոր կրկնել իր այն պնդումն, ըստ որի՝ հայտարարագիր չներկայացրած քաղքացիների նկատմամբ միայն տուգանք է կիրառվելու։

«Մի ամիս մտածելուց հետո մեր ՊԵԿ նախագահը մի երեք էջով Հարկային օրենսգրքի համապատասխան հոդվածներին է ինձ ծանոթացնում։ Բայց իմ հարցը շատ հստակ է, ասում եմ այն, ինչ բանավոր ասեցիք՝ գրավոր հաստատո՞ւմ եք։ Ասում է, որ քրեական հետապնդումը բացառելու հնարավորության հարցի վերաբերյալ դիրքորոշում տալը դուրս է ՀՀ ՊԵԿ իրավասությունների շրջանակներից»։

Խամոյանը նշեց, որ ՀՀ Քրեական օրենսգրքի 444 հոդվածը սահմանում է, որ ՀՀ օրենսդրությամբ սահմանված հայտարարագիր ներկայացնելու պարտականություն ունեցող անձի կողմից հայտարարագրում կեղծ տվյալներ ներկայացնելը, հայտարարագրման ենթակա տվյալները թաքցնելը կամ հայտարարագիր չներկայացնելը ենթադրում է առավելագույնը 3 տարի ժամկետով ազատազրկում։ «Մեջբերում եմ, ՀՀ օրենսդրությամբ սահմանված հայտարարագիր ներկայացնելու պարտականություն ունեցող անձի կողմից հայտարարագրում կեղծ տվյալ ներկայացնելը կամ հայտարարագրման ենթակա տվյալը թաքցնելը, որը հանգեցրել է առանձնապես խոշոր չափերով գույքի կամ եկամուտի, կամ ծախսի չհայտարարագրման՝ պատժվում է ազատազրկմամբ 3-6 տարի ժամկետով։ Ուզում եմ ձեր ուշադրությունը հրավիրել այն հանգամանքի վրա, որ առանձնապես խոշոր չափ է համարվում 1 մլն ՀՀ դրամը գերազանցող գումարը։ Քրեական օրենսգրքի 444 հոդվածը տարածվում է հայտարարագիր ներկայացնելու պարտականություն ունեցող անձանց վրա, այսինքն, խոսքը պաշտոնյայի մասին չէ։ Իսկ այսօր բոլորն են պարտավոր ներկայացնի հայտարարագիր»։

Խամոյանը նաև նույն բովանդակությամբ հարցում է ուղարկել նաև Գլխավոր դատախազ Աննա Վարդապետյանին։ Հարցմանը պատասխանել է արդարադատության երրորդ դասի պետական խորհրդական Եղիազար Ավագյանը։ «Եղիազար Ավագյանը ԱԺ պատգամավորի հարցմանը ի պատասխան ասում է, որ «Ձեր կողմից բարձրացված հարցի վերաբերյալ դիրքորոշում ներկայացնելը դուրս է ՀՀ դատախազության սահմանադրական լիազորությունների շրջանակից»։ Դատախազը ինստիտուտ է, որը հանրային քրեական հետապնդում է հարուցում որևէ անձի նկատմամբ որևէ արարքի համար։ 3 ամիս շարունակ մի պարզ հարցի պատասխան ես այդպես էլ չեմ կարողանում ստանալ։ Արդյո՞ք քրեական հետապնդման են ենթարկվելու մեր այն քաղաքացիները, ովքեր հայտարարագիր չեն լրացնելու կամ սխալ հայտարարագիր են լրացնելու։

Հիմա օգտվելով այս հրաշալի հնարավորությունից, քանի որ մեր երկրի դատախազը, դատավորը, վարչապետը, մսով ճաշի մասնագետը, հեծանվորդը, մեր ամեն ինչը Նիկոլ Փաշինյանն է, հրապարակային ձևակերպում եմ հարցս և ակնկալում եմ հստակ պատասխան, ՀՀ քաղաքացին դատվելո՞ւ է հայտարարագիր չներկայացնելու համար, այնպես ինչպես սահմանում է Քրեական օրենսգրքի 444 հոդվածը»,-ասաց Խամոյանը։