Լարված իրավիճակ Արցախի ներկայացուցչության շենքում

Այս պահին լարված իրավիճակ է Արցախի ներկայացուցչության շենքում, մի խումբ արցախցիներ մուտք են գործել ներս՝ ասելով, որ Արցախի իշխանությունները պարտավոր են լսել իրենց պահանջները։

Մասնավորապես՝ արցախցիները պահանջում են, որ Արցախի հանրապետության նախագահ Սամվել Շահրամանյանն իրենց հետ գնա ՀՀ դատախազություն և պահանջի, որ ողջամիտ ժամկետներում պարզեն, թե ով է թալանել Արցախի Հանրապետությունը։

«Ասում են, որ Արցախը թալանել են, մենք էլ պահանջում ենք, որ պարզեն, թե ո՞վ է թալանել, կա նման դիմում, թո՛ղ հետաքննեն»,- հայտարարել են ակցիայի մասնակիցները՝ նշելով, որ նման հաղորդում ներկայացնելու մասին հայտնել է անձամբ Սամվել Շահրամանյանը։
Ակցիայի նախաձեռնության ակտիվիստներից է Արթուր Օսիպյանը, որը ժամանակին Արցախում բավական ակտիվ ընդդեմ ռուս խաղաղապահների ակցիաներ էր նախաձեռնում։

Այսօր Օսիպյանը վստահեցնում էր, որ տեղեկություններ ունեն, թե հիմնադրամի միջոցով 467 միլիոն դոլար վերջին մի քանի տարվա մեջ փոխանցվել է մի 45 ընտանիքի եւ ուզում են դա պարզել։

Բողոքի մասնակիցներին ներս հրավիրեցին քննարկման, այս պահին շենքում մեկնարկել է հանդիպումը։

pastinfo.am