Պետք է հասկանանք, թե որքանով են անկեղծ Ադրբեջանի մտահոգությունները․ Միրզոյան

Ե՛վ Ադրբեջանի, և՛ հայատասնյան կողմի դիրքորոշումները երկու հարցի վերաբերյալ էլ հայտնի են։ Օրեր առաջ նախարար Բայրամովի հետ Անթալիայում փորձեցինք մի փոքր առաջ գնալ։ Ասել, որ ունենք վերջնական հանգուցալուծում կամ պայմանավորվածություն, չափազանցություն կլինի, բայց ես կարծում եմ, որ խոսակցությունը պետք է շարունակել: Այս մասին ասաց ՝ անդրադառնալով ԵԱՀԿ ՄԽ–ի լուծարման և ՀՀ Սահմանադրության մեջ փոփոխություններ կատարելու Ադրբեջանի պահանջին։

«Մենք կարծում ենք, որ դե ֆակտո ավարտված հակամարտությունը դե յուրե ավարտելու դեպքում, որի մարմնավորումը կարող է լինել խաղաղության համաձայնագրի ստորագրումը, այլևս անհրաժեշտություն չի լինի ունենալ միջազգային մի ձևաչափ, որը կոչված է զբաղվելու այդ հակամարտությամբ»,– ասաց նա՝ նշելով, որ հայկական կողմը բաց է Մինսկի խմբի լուծարման գործընթացին։

Ինչ վերաբերվում է ՀՀ Սահմանադրությանը՝ Միրզոյանը նշեց, որ պետք է հասկանալ, թե որքանով են անկեղծ Ադրբեջանի մտահոգությունները։

«Եթե սա ուղղակի գործիք է, խոսույթ, որն օգտագործվում է Ադրբեջանի կողմից բանակցությունները ձգձգելու և ստորագրված խաղաղությունը չունենալու, սա մի իրավիճակ է։ Եթե անկեղծորեն մտահոգություն են տեսնում, սա մեկ այլ իրավիճակ է, և այստեղ կարող ենք բացատրություն տալ, խոսել հարցի մասին,– ասաց նա՝ նշելով, որ ՀՀ Սահմանադրությունը չունի որևէ տարածքային պահանջ Ադրբեջանի նկատմամբ։