Միութենական պետության ապակայունացման համար Արևմուտքն օգտագործում է լայն զինանոց. ԱՀԾ

Արևմտյան հատուկ ծառայություններն ակտիվորեն օգտագործում են Ուկրաինայի հակամարտությունը Միութենական պետության սահմաններում իրավիճակը ապակայունացնելու համար։ Այս հարցը դարձել է Ռուսաստանի արտաքին հետախուզության ծառայության (ԱՀԾ) տնօրեն Սերգեյ Նարիշկինի և Բելառուսի պետական անվտանգության կոմիտեի (ՊԱԿ) նախագահ Իվան Տերտելի բանակցությունների առանցքային հարցերից մեկը, հայտնում է ԱՀԾ մամուլի բյուրոն։

 Այսօր Բելառուսի Մոգիլյով քաղաքում տեղի է ունեցել Ռուսաստանի ԱՀԾ-ի և Բելառուսի ՊԱԿ-ի կոլեգիաների համատեղ նիստը: Հանդիպման ընթացքում ամփոփվել են հետախուզական գործունեության հիմնական ուղղություններով երկկողմ համագործակցության արդյունքները, ինչպես նաև սահմանվել են Արևմուտքի կողմից պահպանվող ճնշման պայմաններում հետագա աշխատանքի առաջնահերթությունները:

Ինչպես նշվում է հաղորդագրության մեջ, բանակցությունների ընթացքում երկու գերատեսչությունների ղեկավարներն ընդգծել են, որ հավաքական Արևմուտքը, առանձնապես՝ առավել թշնամական տրամադրված ՆԱՏՕ-ն և ԵՄ-ն, շարունակում են տարածաշրջանում իրավիճակի վրա ունենալ բացասական ազդեցություն:

Ուկրաինական ճգնաժամն օգտագործվում է որպես ապակայունացման գործիք, ընդ որում՝ գործադրվում է արևմտյան հատուկ ծառայությունների հնարավորությունների լայն շրջանակ։

 Ինչպես ընդգծվել է, այս պայմաններում արտաքին սպառնալիքներին արդյունավետ հակազդելու համար անհրաժեշտ է միավորել Ռուսաստանի և Բելառուսի հետախուզական կառույցների ջանքերն ու ներուժը։