Ժողովուրդ ջան, Փաշինյանը թույլ է տալիս

Մարդիկ, որոնք հայտնի են հիմնականում իրենց կրիմինալ անցյալով, իրենց հին վարքով հիմա հաճախ նաև փորձում են ընտրությունների մասնակցել, հին սովորությունները հետ բերել, այսօր ԱԺ նիստում ասաց ԱԺ նախագահ Ալեն Սիմոնյանը՝ նշելով, որ գալիք ընտրություններում նույնպես ականատեսն են լինելու վերոնշյալի։

Ի պատասխան Նիկոլ Փաշինյանն ասաց. «Կառավարությունը ունի մի ծրագիր, որ Հայաստանում իշխանությունը ընտրում է ժողովուրդը։ Կառավարությունը ունի այդ ծրագիրը՝ ապահովել ժողովրդի ազատ, արդար, թափանցիկ ընտրելու իրավունքը։ Ժողովուրդը ում կընտրի, կընտրի։

Այսօր բանտում մարդիկ կան, որ ընտրությունից առաջ ձերբակալվում են, ասում են՝ տենց արեցին, որ ընտրությունները կեղծեն, ընտրություններից հետո ձերբակալվում են, ասում են՝ այ այդպես արին, որ ընտրությունների արդյունքները, ժողովրդի ընտրությունը չկայանա:

Չհասկացա, այսինքն ես պիտի համարեմ, թե ով է արժանի ժողովրդի ձայնին, ով արժանի չի՞։ Գնում, ընտրում են, ժողովուրդն է ընտրում, մեր առաքելությունն այն է, որ ժողովուրդը պետք է ունենա ազատ ընտրելու իրավունք, ապահովել ենք ազատ ընտրելու իրավունքը։

Էն օրը գյուղ եմ գնացել, քաղաքացին ասում է՝ «էս ինչ ալիքը ինչո՞ւ չես փակում», ասում եմ՝ հարգելիս, ուզում ես փակես, դու փակի, ասում է՝ «ո՞նց փակեմ», ասացի՝ պուլտը ձեռդ է, ընդ որում, պարտադիր չէ, որ անընդհատ ալիք փոխելիս հանդիպես, կարգավորում կա, որ ասում ես՝ այս ալիքը իմ մենյուից հանի»։

Փաշինյանը շեշտեց՝ ում ուզում եք ընտրեք, ընտրեք ու վայելեք։