Ամեն օր կրակոցներ են լինում՝ նույն ժամերին, դեպի գյուղ են կրակում․ Խնածախի նախկին համայնքապետ

Այս օրերին ամեն օր էլ կրակոցներ կան՝ նույն ժամերին։ Երեկ երեկոյան էլ՝ ժամը 22։20-ին, կրկին կրակոցներ են եղել, կարճ դադար տվել, հետո՝ կրկին կրակել; Մի երեք անգամ այդպես կրկնվել է։ Այս մասին «Փաստինֆո»-ի հետ զրույցում ասաց Սյունիքի մարզի Խնածախ համայնքի նախկին ղեկավար Կարո Թավադյանը։
«Ամեն օր կրակոցներ լինում են՝ բացառությամբ մի երկու շաբաթ առաջ՝ երկու-երեք օր չկար, մնացած օրերին կա՝ ամսի 20-ից սկսած և առ այսօր»,- պատմեց նա։
Հարցին ի պատասխան, թե հարցին՝ հենց գյուղի ուղղությա՞մբ են կրակում՝ Թավադյանը նշեց, որ շինությունների վրա վնասված հետքեր կան՝ պատերի, տանիքի վրա․ «Դեպի գյուղ են կրակում»։

Բնակիչների շրջանում խուճապ չկա, տղամարդիկ՝ հանգիստ վիճակում են, կանանց ու երեխաների մոտ՝ ամեն դեպքում վախ կա։
Նախորդ տարիներին Խնածախի ուղղությամբ առհասարակ կրակոցներ, հիմնականում, չեն եղել, թե ինչի մասին է վկայում դեպքերի ինտենսիվության աճը՝ Թավադյանը չի կարող ասել, նշում է՝ հնարավոր է՝ փորձում են հրահրել մեր տղաներին, որ պատասխան կրակեն, միջադեպ լինի․ «Չեմ կարող ասել»։
Հիշեցնենք, որ ՀՀ ՊՆ-ն հաղորդել էր, որ ապրիլի 13-ին՝ ժամը 22:20-ի սահմաններում, Ադրբեջանի ԶՈՒ ստորաբաժանումները կրակ են բացել Սյունիքի մարզի

Խնածախ բնակավայրի ուղղությամբ, ինչի հետևանքով վնասվել է գյուղի մշակույթի տունը:

«Տուժածներ չկան: Ադրբեջանական կողմին կոչ ենք անում հետաքննել Խնածախի մշակույթի տան գնդակոծման փաստը և հանդես գալ հրապարակային պարզաբանումներով»,- հայտարարել է ՀՀ ՊՆ-ն։

Հեղինակ՝ Իզաբել Սահակյան