Կարող է դոլարի «обвал» լինի, արթնանանք, տեսնենք՝ 1 դոլարն արժե 100 դրամ. դա աղետ կլինի մեր տնտեսության համար. Հրանտ Բագրատյան
«Պրեսսինգ» հաղորդաշարում Սաթիկ Սեյրանյանի հյուրը ՀՀ նախկին վարչապետ, «Ազատություն» կուսակցության նախագահ և «Միասին» շարժման համահիմնադիր Հրանտ Բագրատյանն էր։
Վերջինս անդրադարձավ նաև ԱՄՆ-Չինաստան առևտրային պատերազմին, մաքսային տարիֆների բարձրացմանը ու դրա ազդեցությանը մեր տարածաշրջանի երկրների, այդ թվում՝ Հայաստանի տնտեսության վրա:
«Թրամփը խոսում է ԱՄՆ-ի ռեինդուստրիալիզացիայի մասին։ Սա քայլ է դեպի հետ։ ԱՄՆ-ը ծանր մաքսատուրքեր է սահմանել մի շարք երկրների դեմ, և նրան պատասխանել է միայն Չինաստանը։ Հավանաբար չինական ղեկավարությունը մտածում է՝ ավելի լավ է հիմիկվանից նոր շուկաներ գտնեն։ Չինաստանը կարող է նաև սանկցիաներ դնել ամերիկյան ծառայությունների դեմ․ դա հզոր հարված կլինի… Իսկ ԱՄՆ-ը հաշվարկե՞լ է՝ բա որ Չինաստանը սկսի վաճառել ամերիկյան պա՞րտքը, ամերիկյան արժեթղթերը՝ 3-րդ երկրների, երկրորդական շուկայում… պատկերացնո՞ւմ են՝ ինչ կլինի… Այդ դեպքում կլինի դոլարի փլուզում, ինչն աղետալի կլինի ամբողջ աշխարհի, այդ թվում՝ Հայաստանի համար»,- ասաց Հրանտ Բագրատյանը:
Տնտեսագետը նկատեց՝ ԱՄՆ-Չինաստան առևտրային պատերազմն արդեն սկսված է։ Նրա խոսքով՝ ամերիկացի տնտեսագետները պետք է արտահայտվեն, լռելը ելք չէ այս իրավիճակում, քանի որ Թրամփի այս որոշումից կտուժի ամբողջ աշխարհը, այդ թվում՝ Ամերիկան։
Մեկուկես ամսվա ընթացքում՝ երկու հանդիպում․ ի՞նչ են քննարկում Ալիևն ու Էրդողանը
«Թրամփի կողմից մաքսատուրքերի բարձրացմամբ առաջացած այս իրավիճակը նախ կթուլացնի մեր տարածաշրջանի երկրներին, առաջին հերթին՝ Թուրքիային։ Ռուսաստանը ճեղքեր կգտնի ու դուրս կգա տնտեսական շրջափակումից։ Թուրքիայի համար միշտ հեշտ է եղել, երբ ԱՄՆ-ը և ԵՄ-ն միասին են օգնել իրեն, հիմա այդ վիճակը չէ։ Հայաստանը միանշանակ տուժելու է։ Ոսկի չկա, իսկ մեր շուկան սովոր չէ եվրոյի հետ աշխատել։ Հայաստանի Կենտրոնական բանկը (ԿԲ) իրավիճակին համարժեք չի գործում։ Մի՛ նայեք, որ ԿԲ նախագահն ասում է՝ Հարվարդ եմ ավարտել, ընդամենը կուրսեր է ավարտել։ Այս իրավիճակից շահած դուրս կգան, կրկնում եմ, Ռուսաստանն ու Իրանը»,- ասաց Հրանտ Բագրատյանը:
Նա նաև նշեց, որ չինացիները միակ ուժն էին, որ կարող էին կառուցել Հյուսիս-Հարավի հյուսիսային հատվածը։ Դա այլևս չի կառուցվի։
«Սրանք խոչընդոտներ են ստեղծում չինացիների կողմից առաջարկվող բոլոր նախագծերի համար: Արդյունքում՝ մենք զրկվում ենք ճանապարհից, իսկ Իրանի հետ մենք նորմալ ճանապարհ չունենք»,- եզրափակեց Հրանտ Բագրատյանը:
Մանրամասները՝ տեսանյութում:
Հետևեք մեզ Viber-ում
