ՀՀ-ի եվրաինտեգրման գործընթացն անհասանելի է. Վլադիմիր Նովիկով
ԱՊՀ երկրների ինստիտուտի Կովկասի բաժնի վարիչ Վլադիմիր Նովիկովը «ԵՄ, թե՞ ԵԱՏՄ. Կկարողանա արդյոք Հայաստանը նստել երկու աթոռի վրա» քննարկման ժամանակ Alpha News-ին մեկնաբանել է Հայաստանի եվրաինտեգրման հեռանկարները:
Ըստ փորձագետի՝ Հայաստանը կարող է շատ սխալներ թույլ տալ եվրաինտեգրման ճանապարհին:
««Եվրաերազանքը» և իրականությունը տարբեր բաներ են: Հայաստանի եվրաինտեգրում կոչվածը ներկայումս անհասանելի գործընթաց է, բայց այս գործընթացում շատ բան կարող է սխալ լինել: Կարծում եմ, որ պարոն Փաշինյանը փորձում է շոու սարքել ներքին քաղաքական լսարանի համար՝ չհասկանալով, որ այս շոուն կարող է շատ տհաճ ազդեցություն ունենալ արտաքին լսարանի վրա, բայց նա դա արդեն արել է, երբ ասում էր. «Հայաստան և վերջ», այսինքն՝ ամեն տեսակ «ստեփանակերտցիները» չպետք է իրենց կարգը պարտադրեն Երևանում։ Եվ արդյունքում ստացավ այն, ինչ ստացավ»,-ասել է Նովիկովը։
Փորձագետի կարծիքով՝ ԵՄ-ին անդամակցելը նշանակում է ԵԱՏՄ-ի հետ ավտոմատ խզում:
«ԵՄ-ի և ԵԱՏՄ-ի համակիրների թիվը մոտավորապես հավասար է: Ներկայիս իշխանության վարկանիշը, մեղմ ասած, այնքան էլ լավը չէ, բայց ընդդիմության վարկանիշը նույնպես շատ բան է ասում: Ուստի, պարոն Փաշինյանը փորձում է մի քաղաքական գործչի դեր կատարել, ով ցանկանում է ժեստեր անել և՛ արևմտամետներին, և՛ ռուսամետներին: Նա փորձում է ինչ-որ ժեստեր անել՝ իրականում չհասկանալով, թե ինչպես են դրանց նայում նույն ռուս իշխանությունները:
ԵՄ-ին անդամակցելը նշանակում է ավտոմատ խզում ԵԱՏՄ-ից, և դա ոչ թե ինչ-որ քաղաքական հակամարտությունների խնդիր է, այլ այն, որ նրանց տնտեսական համակարգերն այլ կերպ են կառուցված։ Ավելին, կարծում եմ, որ Ռուսաստանը ստիպված կլինի շատ առումներով փակել իր շուկաները հայկական ապրանքների համար, քանի որ չի կարելի միաժամանակ երկու աթոռի վրա նստել»,-եզրափակել է Նովիկովը։
Հետևեք մեզ Viber-ում
