Հայաստանն այսօր երկփեղկված է

Գյումրու ու Փարաքարի ընտրությունները եւ էլի շատ ու շատ այլ ցուցիչներ խոսում են այն մասին, որ Հայաստանն այսօր երկփեղկված է` կա վիրտուալ, սոցցանցային, հորինված Հայաստան եւ կա մի Հայաստան, որտեղ բոլորովին այլ տրամադրություններ ու իրավիճակ է տիրում, որտեղ շիտակ հարաբերություններ են եւ իրական կյանք կա: Վիրտուալ, ֆեյսբուքյան Հայաստանում ճղճիմ ու փոքրոգի քննարկումներ են, գզվռտոց, շոուներ, փիառ, ատելության խոսք, հային հայի դեմ հանելու, մի կտոր հացի համար իրար կոկորդ կրծելու, անհասցե ստատուսների ու իրար պախարակելու մթնոլորտ: Իսկ իրական Հայաստանում (չշփոթել` Նիկոլ Փաշինյանի «Իրական Հայաստանի» հետ) առողջ, ստեղծարար մթնոլորտ է` միմյանց նկատմամբ հարգանքի, արցախցիների հանդեպ սիրո, հայրենիքի հանդեպ նվիրումի, թշնամու հանդեպ անհաշտ լինելու մթնոլորտ: Այս Հայաստանն ուզում է օր առաջ երկրում իշխանափոխություն անել, հասկանում է, թե որտեղից են գալիս մեր պետության դեմ ուղղված վտանգները եւ գիտի, թե որն է լուծումը: Այս Հայաստանում չեն սիրում կեղծիքն ու երեսպաշտությունը, չարությունն ու ինտրիգները: Այս Հայաստանում գիտակցում են, որ մենք բարդ իրավիճակում ենք հայտնվել, եւ մեզ իրական դաշնակիցներ են պետք, իսկ դարավոր թշնամին երբեք չի կարող դաշնակից լինել, հրաժարվել իր վաղեմի` Հայաստանը ոչնչացնելու, երազանքներից: Պարզ, աշխատող, արարող մարդիկ են այս Հայաստանում, որոնք եթե անգամ մտնում են Ֆեյսբուք, համացանցային այդ պղտոր ու հակամարդկային իրարանցմանը լուրջ չեն վերաբերվում: Գիտեն, որ սոցցանցերում գրված սրտաճմլիկ ստատուսներով չի որոշվելու մեր երկրի ճակատագիրը, ոչ էլ սոցցանցային պատերազմներում ենք հաղթելու թշնամուն, եւ անգամ ներընդդիմադիր շրջանակների պայքարի ճակատագիրն այստեղ չի որոշվելու: Եվ իշխանություն երկրում ձեւավորելու է, ապագա կառուցելու է այս իրական Հայաստանն ու իրական հայաստանցին:

«Հրապարակ» օրաթերթի գլխավոր խմբագիր Արմինե Օհանյան