«Կգնա՛ք, կավելացնե՛ք նոր կգաք». Աղազարյանին կաշառքի գործով հարցաքննության են կանչել

«Ժողովուրդ» օրաթերթը գրում է. ««Ժողովուրդ» օրաթերթի բացառիկ տեղեկությունների համաձայն՝ այսօր ԱԺ պատգամավոր Հովիկ Աղազարյանին կրկին կանչել են Հակակոռուպցիոն կոմիտե՝ հարցաքննության։ Մեզ հասած տեղեկություններով, հարցաքննությունը լինելու է մանր եղջերավոր անասուններ էմիրատներ արտահանելու կաշառքի քրեական գործի վերաբերյալ: ԱԺ պատգամավորը եւ էլի մեկ մեղադրյալ առերես հարցաքննության կներկայանան։

Նշենք, որ Հովիկ Աղազարյանի դեմ ցուցմունք տված անձը՝ Աշոտը, պատմել է իրավապահներին, որ 300 հազար ԱՄՆ դոլար կաշառքը չեն կարողացել տալ ու վերջում պայմանավորվել են 100 հազար դոլար տալ Աղազարյանին։ Գնացել, հանդիպել են նրան ՀՀ Ազգային ժողովին հարակից զբոսայգում, եւ հենց այնտեղ 20 հազար դոլար է առաջարկվել Աղազարյանին, սակայն պատգամավորը զայրացել է ու ասել, թե «պայմանավորվել էինք 100 հազար ԱՄՆ դոլար, ինչու եք քիչ բերել, չեմ վերցնում»: Առաջարկել է՝ «կգնա՛ք, կավելացնե՛ք նոր կգաք»։ ԱԺ պատգամավոր Հովիկ Աղազարյանը այս քրեական վարույթով մեղադրյալ է եւ չի ընդունում մեղադրանքը։

Հավելենք նաեւ, որ Աղազարյանի դեմ ցուցմունք տված անձանց մասով քրեական գործը դատարանում է, իսկ Հովիկ Աղազարյանի առնչությամբ քննությունը Հակակոռուպցիոն դատարանում է շարունակվում, եւ այս վարույթի շրջանակում էլ այսօր նրան կրկին կանչել են Կոմիտե»։

Մանրամասները՝ «Ժողովուրդ» օրաթերթի այսօրվա համարում: