Իսրայելի ռմբակոծության հետևանքով Գազայի հատվածում մեկ օրում շուրջ 50 պաղեստինցի է զոհվել

Իսրայելի զորքերի կողմից Գազայի հատվածում ռմբակոծության հետևանքով 24 ժամվա ընթացքում շուրջ 50 պաղեստինցի է զոհվել, ևս 146 մարդ վիրավորվել է։ Այս մասին հայտնել է Al Jazeera-ն։

 Շուրջ 30 մարդ զոհվել է ապրիլի 9-ին Գազա քաղաքի արևելքում գտնվող Շուջաիյա թաղամասի թիրախավորման հետևանքով։ Իսկ 17 մարդ զոհվել է ապրիլի 10-ի լուսադեմից ի վեր։ Իսրայելի պաշտպանության բանակն իր հերթին հայտնել է Գազային հասցրած հարվածների մասին։

ԻՊԲ-ի Telegram ալիքում տարածված հաղորդագրության համաձայն՝ ապրիլի 9-ին Իսրայելի ռազմաօդային ուժերը հարվածներ են հասցրել Գազայի հատվածում «ահաբեկչական կազմակերպություններին պատկանող մոտ 35 թիրախի», այդ թվում՝ դիպուկահարների դիրքերի և դիտակետերի, որոնք ուղիղ վտանգ էին ներկայացնում Իսրայելի համար։

Պաղեստինյան հասարակական կազմակերպությունների ցանցը հայտարարել է, որ Գազայում բռնի տեղահանվածների թիվը կազմել է շուրջ երկու միլիոն՝ ավելացնելով, որ շուրջ 40 օր է՝ Գազայի հատված մուտք չի գործել ոչ մի տեսակի հումանիտար օգնություն։

Գազայի առողջապահության նախարարությունը հայտնել է, որ 2023 թ. հոկտեմբերի 7-ից ի վեր առնվազն 50 886 պաղեստինցի է զոհվել Գազայի դեմ Իսրայելի պատերազմի հետևանքով, վիրավորվել է շուրջ 115 875 մարդ:

Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր 1139 մարդ, գերեվարվել՝ շուրջ 250 մարդ։