Անդրեի կնոջ գրառումն ստուգվում է ՆԳՆ-ում
Երգիչ Անդրեի՝ Անդրեյ Հովնանյանի, նախկին կնոջ՝ Անի Օհանյանի գրառումը դատախազությունն ուղարկել է ՆԳՆ ոստիկանության ՔՈԳՎ Երևան քաղաքի վարչություն՝ ստուգողական գործողություններ կատարելու։ Այս մասին «Փաստինֆո»-ն տեղեկանում է ՀՀ գլխավոր դատախազությունից։
Հիշեցնենք, որ Անի Օհանյանը երգիչ Անդրեի հետ բաժանումից հետո, տևական լռություն պահպանելով, նախօրեին՝ ապրիլի 6-ին, ինստագրամյան իր էջում գրառում է կատարել՝ երգչին փաստացի մեղադրելով ընտանեկան բռնության մեջ։
«Իմ ճանապարհը լի էր վախերով ու պայքարով։ Ես սիրում էի այն մարդուն, ով հմայեց ինձ: Բայց ջենթլմենի գեղեցիկ դիմակի հետևում սարսափելին էր թաքնված։
Սկզբում ամբողջ ժողովրդի աչքի առաջ ծնվեց հեքիաթը։ Դուք հավատացիք նրան այնպես ինչպես ես: Շուտով աշխարհը սկսեց փլմւզվել: Իմ ամեն օրը սկսվում էր տագնապով ու անհանգստությունով՝
«Այսօր նա չար կլինի, թե բարի, նորից կվիրավորի, կհարվածի, թե կրկին սպառնալու է, որ կզրկի երեխայից»։
Ես կարծում էի, որ կարող եմ փրկել ընտանիքը և փոխել նրան դեպի լավը, սակայն նրա ագրեսիան միայն աճում էր ։ Նա չէր գիտակցում, թե որքան ցավ է պատճառում ինձ:
Ես զգում էի, որ հոգիս դանդաղորեն քանդվում է, բայց շարունակում էի հուսալ, որ նա կհասկանա և կփոխվի: Ես հասկացա, որ սերը չպետք է տառապանք բերի: «Կներես» բառը ելք չէ ։ Դա անընդհատ կրկնվում էր: Այսօր ես համարձակվում եմ խոսել:
Այս ամբողջ ընթացքում ես ստիպված էի ժպտալ տեսախցիկների և մարդկանց առջև՝ցուցադրել «երջանկություն» այն ժամանակ ,երբ ոչ ոք չգիտեր , թե ինչ է կատարվում փակ դռների հետևում:
Այս գրառումը ոչ միայն աղաղակ է հոգու, դա կոչ է բոլոր կանանց, ովքեր տառապում են ինձ նման։ Աղջիկներ, կանայք ,մայրեր Դուք արժանի եք սիրո, որը բերում է լույս և ոչ թե խավար»,-գրել է Օհանյանը։
Այս գրառումը փաստացի կարող է դիտարկվել որպես հանցագործության մասին հաղորդում։ Այժմ դատախազությունն ընթացք է տվել այս հայտարարությանը։
Ի դեպ, մամուլում տեղեկություններ են շրջանառվել, որ ԱՄՆ-ում դատավարություն է ընթանում և Անդրեն երեխային տեսակցում է՝ դատարանի որոշմամբ։ Թե որքանով այս գործընթացը կարող է անդրադառնալ դատավարության ընթացքի, Անդրեի ծնողական իրավունքի վերաբերյալ՝ ցույց կտա ժամանակը։
Հեղինակ՝ Իզաբել Սահակյան
Հետևեք մեզ Viber-ում
