Դատարանում տեղի ունեցած միջադեպի և կարգադրիչի մահվան դեպքի առթիվ նախաձեռնվել է քրեական վարույթ

Երևանի ընդհանուր իրավասության քրեական դատարանի «Շենգավիթ» նստավայրում երեկ տեղի ունեցած խառնաշփոթի և դատական կարգադրիչի մահվան դեպքի առթիվ նախաձեռնվել է քրեական վարույթ։ ՔԿ մամուլի քարտուղար Կիմա Ավդալյանը «Փաստինֆո»-ի հետ զրույցում հայտնեց, որ կարգադրիչի մահվան դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 297-րդ հոդվածի 1-ին մասի (խուլիգանության) և 155-րդ հոդվածի 1-ին մասի (սպանության) հատկանիշներով:

Ինչպես արդեն տեղեկացրել ենք՝ 35-ամյա Տաթևիկ Աբրահամյանի սպանության մեջ մեղադրվող Նարեկ Սարգսյանի գործով դատական նիստի ընթացքում խառնաշփոթ է եղել։ Նիստերի դահլիճում գտնվող անձանցից մեկը հայտարարել է, թե ինքն է սպանել Տաթևիկ Աբրահամյանին, ապա՝ դիմել է փախուստի։ Նարեկ Սարգսյանը հունից դուրս է եկել, իրավիճակը գերլարվել է, դահլիճում սեղան է կոտրվել, կարգադրիչները փակել են դուռը, որ քաղաքացուն կարողանան «փրկել» Նարեկ Սարգսյանից։ Ծառայողական պարտականությունները կատարելու ընթացքում կարգադրիչներից մեկը, որը կարգուկանոն էր իրականացնում դահլիճում, մահացել է՝ սրտի կանգից։ Նախնական տեղեկություններով՝ կարգադրիչն ունեցել է նաև շաքարային դիաբետ։

Դատական դեպարտամենտը քիչ առաջ հաղորդագրություն է տարածել՝ ԲԴԽ-ի և Դատական դեպարտամենտի անունից հայտնելով ցավակցությունը։ Կառույցից մանրամասնել են, որ 52 տարեկան հասակում իր ծառայողական պարտականությունները կատարելիս, առողջական խնդիրներով պայմանավորված, կյանքից հեռացել է Երևան քաղաքի առաջին ատյանի ընդհանուր իրավասության քրեական դատարանի Շենգավիթի բաժնի դատական կարգադրիչ Արմեն Մաթևոսյանը։ Կառույցից նաև հայտնել են, որ Արմեն Մաթևոսյանի հոգեհանգստի արարողությունը տեղի կունենա ապրիլի 11-ին, ժամը՝ 18:00-ից Երևան քաղաքի Նուբարաշեն փողոցի 46 հասցեում գտնվող սգո սրահում։ Հուղարկավորությունը՝ հաջորդ օրը, նույն վայրից, ժամը՝ 13:00-ին:

Հեղինակ՝ Իզաբել Սահակյան