Արման Բաբաջանյանը 1.5 մլն դոլարանոց տուն է գնել ԱՄն-ում՝ փոխկապակցված անձի անվամբ, սակայն նրա գլխավորած կուսակցությունը ոչինչ չի հայտարարագրել, իսկ որտեղ է դատախազությունը

«Փաստինֆո»-ի հավաստի տեղեկություններով՝ «Հանուն հանրապետության» կուսակցության, «1-ին.am» լրատվական կայքի հիմնադիր Արման Բաբաջանյանը 1.5 մլն դոլար արժողությամբ տուն է գնել ԱՄՆ-ում՝ Գլենդելում։ Ընդ որում, նա այդ տունը չի գրանցել իր անունով, այլ ինչպես դատախազությունն է սիրում ձեւակերպել, փոխկապակցված անձի՝ քրոջ անունով։

Նշենք, որ 2022 թ-ին, որպես Ազգային ժողովի արդեն նախկին պատգամավոր Արման Բաբաջանյանը հայտարարագրել էր միայն Երևանում 2015 թ-ին ձեռք բերած բնակարանը և նույն՝ 2015 թ-ին Երևանի Մալաթիա-Սեբաստիա համայնքում ձեռք բերած 3 հողամասերը։ Արժեթղթեր, թանկարժեք իրեր, ավանդներ, կանխիկ դրամական միջոցներ Բաբաջանյանը չէր հայտարարագրել, փոխարենը հայտարարագրել էր 8 մլն 226 հազար դրամ բանկային հաշիվ, և ճիշտ այդքան՝ 8 մլն 226 հազար դրամ տարեկան եկամուտ, որը Ազգային ժողովից ստացած աշխատավարձն է եղել։

Նշենք, որ Բաբաջանյանի կուսակցությունը Գյումրիում տեղի ունեցած ՏԻՄ ընտրություններում «Եվրադաշինքի» կազմում աջակցում էր առաջադրված թեկնածու Լևոն Բարսեղյանին եւ ներկայացրած հայտարարագրի համաձայն, կուսակցությունն ունի 0 լումա։

«Փաստինֆոն» փորձեց կապ հաստատել Բաբաջանյանի հետ՝ ճշտելու, թե ինչպես է հաջողվել 2,5 տարվա ընթացքում կուտակել ավելի քան 1 մլն դոլար, որ տուն է գնել Գլենդելի շատ հարգի թաղամասում, սակայն նրա հեռախոսահամարները չէին պատասխանում։

Մենք նաև պարզեցինք, որ Բաբաջանյանը մեկնել է ԱՄՆ, ընդ որում՝ նրա մեկնելու մասին անգամ իր աշխատակիցներից շատ քչերն են իմացել։
Հուսանք՝ դատախազությանը եւս կհետաքրքրի, թե առանձնապես խոշոր չափերի այդ ինչ կեղտոտ գումարներ են շրջանառվում Արման Բաբաջանյանի կողմից կամ նրա միջոցով։