Պահանջում եմ Նիկոլից հրապարակել 1994-2019թթ. ԵԱՀԿ Մինսկի խմբի բոլոր առաջարկները. Էդուարդ Շարմազանով

Էդուարդ Շարմազանովը ֆեյսբուքյան իր էջում գրում է․

 «Պահանջում եմ Նիկոլից հրապարակել 1994-2019 թթ. ԵԱՀԿ Մինսկի խմբի բոլոր առաջարկները։

Արցախի հանձնման թեման չի’ մարսվել ու չի’ մարսվելու։

Պատերազմով Արցախի գլխին դժոխք բերելու թեման չի’ մարսվել ու չի մարսվելու։

Պատերազմի ժամանակ Պուտինի պատերազմը դադարեցնելու ծրագիրը մերժելու թեման չի’ մոռացվել ու չի’ մոռացվելու։

2019-ի հունիսին ԵԱՀԿ ՄԽ համանախագահների առաջարկը մերժելու և Արցախի գլխին պատերազմ բերելու հարցը չի’ մարսվել ու չի’ մարսվելու։

Քաղաքական դաշտը պետք է լինի հետևողական. պետք է Նիկոլից պահանջել հրապարակել 1994-2019 թթ. ԵԱՀԿ ՄԽ առաջարկներն ու ՀՀ իշխանությունների բոլոր պատասխանները։

Նախևառաջ պետք է պահանջել նրանից հրապարակել 2019թ.-ի հունիսի առաջարկը։

Ինչու՞, քանի որ այնտեղ է «թաղված շան գլուխը»։

Նիկոլը հրաժարվել է 2019-ի հունիսին ԵԱՀԿ ՄԽ առաջարկից` բերելով պատերազմ ու կապիտուլյացիա։

Այդ առաջարկով Արցախն ունենում էր միջանկյալ կարգավիճակ, Հադրութն ու Շուշին, Ստեփանակերտն ու Մարտակերտը, Մարտունին ու Ճարտարը, Ասկերանն ու Մատաղիսը, Լաչինն ու Քելբաջարը մնում էին Արցախի վերահսկողության տակ։

Դադիվանքն ու Գանձասարը, Ամարասն ու Ղազանչեցոցը հայի սուրբ աղոթավայր էին շարունակելու մնալ։

Արցախի ժողովուրդը կարող էր պարտադիր իրավական ուժ ունեցող հանրաքվեով որոշել իր վերջնական կարգավիճակը։

Ու ամենակարևորը` այդ ամենն արվելու էր առանց որևէ կրակոցի ու զոհի։

Ես պնդում եմ իմ ասածը։

Թող հրապարակի Նիկոլը ու բոլորդ կտեսնեք, որ նա մերժելով 2019-ի առաջարկը` բերել է մահ, պարտություն ու հայրենազրկում։

Սա պետք է լինի ընդդիմադիր քաղաքական դաշտի գլխավոր պահանջներից մեկը։

Ու այս պահանջին պետք է միանան Արցախը հայկական համարող բոլոր հայորդիները։

Հրապարակել բանակցային փաստաթղթերը. Սա է հարցերի հարցը, և ոչ թե` որ համայնքում ով քանի մանդատ ունի…

Հայաստանի Երրորդ Հանրապետությունը ծնունդ է Արցախյան շարժման։

Հետևբար, ՀՀ քաղաքացիները պետք է պահանջեն Նիկոլից հրապարակել բանակցային ու, մասնավորապես, 2019թ. -ի առաջարկները»։