Զինվորականներին հրամայված է չբացակայել զբաղեցրած դիրքերից. կրակոցների ձայներ լսվել են նաեւ Ջերմուկի հատվածում

Նախօրեին կրակոցներ են հնչել նաև Ջերմուկի հատվածում։ Այս մասին «Փաստինֆո»-ին հայտնել են տեղում ծառայություն իրականացնող զինվորականները:

Ավելին` նկատվում է նաեւ հակառակորդի զինուժի որոշակի կուտակում ու հրամայվել է զինվորականներին չբացակայել` պատրաստ լինելու հնարավոր զարգացումներին: Մեր զրուցակից զինվորականները փաստել են, որ բավական մարտական են տրամադրված։ «Դրան ենք սպասում, բավական է, հոգնել ենք էս իրավիճակից»,-«Փաստինֆո»-ին ասել են զինվորականները։

«Փաստինֆո»-ն մեկնաբանության համար դիմել է ՀՀ ՊՆ-ին, որը կներկայացնենք ստանալուց հետո:

Ինչպես արդեն հայտնել ենք` վերջին շրջանում Ադրբեջանն ակտիվություն է ցուցաբերում հատկապես Սյունիքի ուղղությամբ` արձակելով կրակոցներ, դրանք երբեմն լինում են անկանոն, երբեմն նաեւ հայկական բնակավայրերի, մասնավորապես Խնածախի ուղղությամբ, որի հետեւանքով անգամ բնակչի տուն է վնասվել, ինչի մասին պաշտոնապես հայտել է ՀՀ ՊՆ-ն: ՔԿ-ն էլ նշել է, որ դեպքի առթիվ նախաձեռնվել է քրեական վարույթ:

Նախօրեին հայտնի դարձավ, որ խորհրդակցություն է հրավիրել Ադրբեջանի պաշտպանության նախարարը ու հանձնարարել` պատրաստ լինել ցանկացած «սադրանքի» օպերատիվ արձագանքելու հետ կապված: Մինչդեռ, ինչպես նշեցինք, սադրանքի գնում են հենց ադրբեջանցիները` այս պահին իրենց զբաղեցրած դիրքերից արձակելով կրակցներ: