Ամոթ է, որ կինը «սեքսիստական» բառ է օգտագործում. Ես չգիտեմ էլ՝ դա ինչ է. Վարդան Ղուկասյան

Ես ամոթ եմ զգում, որ ձեզ մոտ «սեքսիստական» բառն եմ օգտագործում: Այս մասին NEWS.am-ի հետ զրույցում նշեց Գյումրիի նախկին քաղաքապետ, այսօր քաղաքապետի թեկնածու Վարդան Ղուկասյանը՝ անդրադառնալով նրան, որ մի շարք ՀԿ-ներ իրեն մեղադրել են սեքսիստական հայտարարություններ անելու մեջ, անգամ հաղորդում են ներկայացրել իր դեմ:

«Ես չգիտեմ՝ ինչ նկատի ունեն այդ կանայք, բայց ես գիտեմ, որ 12 500 քմ հողերը տվեցին, էդքան ջահելներին սպանեցին, դրանց ձեները մենք չլսեցինք: Բայց հիմա երբ ես ասել եմ էն, ինչ գրված է Գրիգոր Տաթեւացու գրքի մեջ, որ ասում է՝ վայ ձեզ, կանայք, որ գայթակղության պատճառն եք հանդիսանում տղամարդկանց, դա չի նշանակում սեքսիստական: Դա նշանակում է, որ զգաստ պահեն իրենց կանայք իրենց հագուստներից: Օրինակ բեմական հագուստ կա պլավկիով դուրս են գալիս, դա բեմական հագո՞ւստ է, թե՞ ազատություն է: Այդպիսի ազատությունը խայտառակություն է: Մենք ինչ որ տեսել ենք մեր տատիկներից, մայրերից, ուզում ենք դա տեսնել; Մենք չենք ասում՝ նախնադարյան ձեւով առաջնորդվել:

Էդ ձեւի անդաստիարակ պահվածքը... ամոթ է, որ կինը «սեքսիստական» բառ է օգտագործում: Ես ամոթ եմ զգում իրենց տեղը: Ես չգիտեմ էլ՝ դա ինչ է, իրենք ինչ նկատի ունեն»,-ասաց նա:

Դիտարկմանը, որ ասում են, որ այդ հայտարարություններում կանանց նկատմամբ բռնություն կա, Վարդան Ղուկասյանն ասաց. «Ի՞նչ բռնություն, թող գնան իրենց տեղը հանգիստ նստեն, շառ են ուզում տալ, մենք դա հասկանում ենք»: