Մեզ պետք են հավակնոտ ծրագրեր ունեցող էլիտաներ, և ո‘չ երբեք սպառողական մտածողությամբ. Արա Պողոսյան
Քաղաքագետ Արա Պողոսյանը գրում է.
«Աշխարհը ապագայի նոր մեխանիզմներ է մտածում, անգամ ԵՄ անդամներն են մտածում նոր մեխանիզմների մասին, նոր հարթակների մասին։
Առաջատար երկրները փորձում են ազատվել անցյալի կանոնակարգերից, իսկ Հայաստանի որոշ պատեհապաշտներ Հայաստանի ժողովրդին համոզում են, թե փրկությունը հին կանոնակարգերին կառչելու մեջ է։ Մնում է ասեն, եկեք ԱՊՀ-ից դուրս գանք ու Անտանտին միանանք, ՄԱԿ-ից դուրս գանք Ազգերի լիգային միանանք։
Լավ, ես մարդիկ գոնե կարո՞ղ են մի քանի տարի հետոյի մասին մտածել, մի կողմ դնել քարոզչական պարտականությունները ու մտածել հետոյի մասին։
Հրեաների հետ համեմատվողները կարո՞ղ են գոնե մի պահ սպառողական մտածողությունը մի կողմ դնել ու մտածել նույն հրեաների նման` մեծ ու հեռավոր նպատակների իրագործման մասին։
Ցավոք ո‘չ, այս մարդկանց խնդիրը այսօրվա հաց վաստակելու մեջ է, ու հենց դա է նաև պատճառը, որ միշտ խոսում եմ նոր էլիտայի ձևավորման անհրաժեշտության մասին։
Մեզ պետք են հավակնոտ ծրագրեր ունեցող էլիտաներ, և ո‘չ երբեք սպառողական մտածողությամբ, կեղծ «պրագմատիզմով» նյարդեր քայքայող խմբակների»։
Հետևեք մեզ Viber-ում
