Մշտապես բաց պահել կերակրադռնակը, օրենքով հատկացված զբոսանքի ժամանակը երկարացնել. ինչից են սկսվել հատուկ գործողությունները դատապարտյալների դեմ

Այսօր իրավապաշտպան Ժաննա Ալեքսանյանը լուր տարածել էր, որ Նուբարաշեն քրեակատարողական հիմնարկում՝ 5-րդ հարկում, բոլոր ցմահ դատապարտյալների ջարդ է կազմակերպվել:

Ավելի ուշ ՔԿԾ-ն պարզաբանում տարածեց, որ «Նուբարաշեն» քրեակատարողական հիմնարկի դատապարտյալներից մեկը, նպատակ ունենալով ձեռք բերել առավելություններ այլ ազատազրկված անձանց նկատմամբ, տևական ժամանակ է՝ խաթարում է հիմնարկի բնականոն աշխատանքը, պարբերաբար ներկայացնում է անօրինական պահանջներ և հրահրում այլ ազատազրկված անձանց նույնպես ներկայացնել նման անօրինական պահանջներ։

Tert.am-ը ՔԿԾ հասարակայնության հետ կապերի բաժնի պետ Նոնա Նավիկյանից հետաքրքրվեց, թե դատապարտյալը հատկապես ի՞նչ անօրինական պահանջներ է ներկայացրել:

Ի պատասխան Նավիկյանն ասաց. «Մշտապես բաց պահել կերակրադռնակը (волчок), օրենքով հատկացված զբոսանքի ժամանակը երկարացնել: Ընդհանուր առմամբ խաթարվել է հիմնարկի բնականոն գործունեությունը»:

Ըստ ՔԿԾ հայտարարության՝ այս պահանջներից հետո ՔԿ-ն որոշում է կայացրել անօրինականություններ ու պառակտում հրահրող դատապարտյալին տեղափոխել այլ քրեակատարողական հիմնարկ, ինչը հարուցել է մյուս դատապարտյալների դժգոհությունը:

Հետևաբար Ծառայության հատուկ նշանակության բաժնի ծառայողները «Նուբարաշեն» քրեակատարողական հիմնարկի ծառայողների հետ համատեղ ձեռնարկել են հատուկ միջոցառումներ ազատազրկված անձանց կողմից ներքին կանոնակարգի խախտումները վերացնելու ուղղությամբ։