«Իրավիճակը պայթելու է, ու 2026 թվական չի լինելու. չգիտենք՝ վա՞ղն ինչ է զիջելու». Հուսիկ Արա

Բանաստեղծ Հուսիկ Արան դիտարկելով Գյումրիում տեղի ունեցած արտահերթ ընտրությունների արդյունքները, հույս ունի, որ ժողովուրդը կմիավորվի և թույլ չի տա, որ օրվա իշխանությունները հասնեն 2026 թվականի ընտրություններ, քանի որ ամեն րոպե ու ժամ Հայաստանից մի հատված է կտրվում ու հանձնվում թշնամուն։

«Միավորումը միշտ իր արդյունքը տալիս է, ինքս սրա մասին բազմիցս խոսել եմ, որ Հայաստանն այս վիճակից դուրս բերելու համար պետք է միավորվեն նախկին 3 նախագահները, սա այսօր ամենակարևորն ու հրատապն է։

Ընդդիմությունից տարբեր ուժեր կային, բայց հիմնականում 4 ընդդիմադիր ուժ ձայն ստացավ, որը միավորվելով՝ կկարողանա վերցնել իշխանությունը։ Իսկ ՔՊ-ի դեպքում ամեն ինչ հասկանալի է՝ այդքան աշխատողներ ունեն, նրանք կարողացան այդքան ձայն տալ։ Հիմա մնում է ընդդիմության միավորումը, որին սպասում ենք, եղավ այն, ինչին սպասում էինք, և տեղի ունեցածն օրինաչափ էր։ Էլ չեմ խոսում Փարաքարի ընտրություններից, որտեղ մարդը միանձնյա հաղթանակ տարավ՝ ընդդեմ ՔՊ-ի»,- 168.am–ի հետ զրույցում ասաց Հուսիկ Արան։

Ըստ նրա, երբ խոսվում է, որ իշխանություններին պետք է հեռացնել 2026 թվականի ընտրությունների միջոցով, շունչը կտրվում է, քանի որ Հայաստանի համար ամեն ժամ ու օր թանկ է։ Հետևաբար՝ իշխանություներին հեռացնելու համար չպետք է սպասել մինչև 2026 թվականը։«Տեսնում եք, ամեն ժամ մի բան սա զիջում է Ադրբեջանին։ Խայտառակություն է, ադրբեջանցի քաղտեխնոլոգները, մտավորականությունը ձեռք են առնում, ասում են՝ «սուրճ պատվիրենք ու սպասենք, որ Հայաստանը պայմանագիր է ստորագրելու, բայց ի՞նչ պայմանագիր, բա մեր «Էրիվանը», մեր «Արևմտյան Ադրբեջանը»»։ Դրա համար չպետք է սպասել 2026 թվականին, մինչ այդ մեր երկրի համար բանը բանից անցած է լինելու, պետք է փողոցային պայքարով, անվստահություն հայտնելով հեռացնել այս իշխանությանը։ Մենք չգիտենք՝ մոտ օրերս ինչ է սպասվելու, Ադրբեջանը կրակում է, իսկ հայկական կողմից «չկրակելու» հրաման կա»,- հավելեց Հուսիկ Արան։

Նա վստահ է՝ ամեն րոպե էլ իրատեսական է, որ ժողովուրդը կարող է իշխանությանը հեռացնել, պազապես անհրաժեշտ է լավ առաջնորդ, որին 3 տարուց ավելի է՝ հանրությունը սպասում է։

«Ամեն րոպե պետք է հասկանանք, որ ՀՀ-ում իշխանափոխությունը Հայաստանի ու մեր պետականության օգտին է լինելու։ Չգիտենք՝ վա՞ղն ինչ է զիջելու, որոնք վերջում մեզ տանելու են վերջնական կործանման։ Երբեմն ինքս շատ եմ քննադատում մեր ժողովրդին, բայց ի՞նչ անի ժողովուրդը, երբ չկա առաջնորդ, նույն այդ ժողովուրդն իր զավակներին տվեց հայրենիքի համար, ի՞նչ անի ժողովուրդը, որին խաբում են։

Հիմա ժողովուրդն ամեն բանից «պրոբկի» նման թռնում է, առաջնորդ չկա։ Սրբազանը եկավ, արեց այն, ինչ կարողացավ։

Դանակը հասել է ոսկորին, մենք՝ հայերս, այս ենք, սպասում ենք, մինչև ամեն ինչ կորցնում ենք, նոր ոտքի ենք կանգնում։ Պահը հասունացել է, իրավիճակը պայթելու է, ու 2026 թվական չի լինելու»,- ընդգծեց Հուսիկ Արան։