Ռուսաստանն ու ԱՄՆ-ն նոր հանդիպում են նախապատրաստում. Ինչ է հայտնել Լավրովը

Ռուսաստանի արտգործնախարար Սերգեյ Լավրովը լրագրողներին ասել է Մոսկվայի և Վաշինգտոնի երկկողմ շփումները կարգավորելու նպատակով նոր հանդիպման նախապատրաստման մասին։ Այս մասին գրում է tass.ru-ն:

Լավրովը նշել է, որ ներկայումս Ռուսաստանի և ԱՄՆ-ի ղեկավարների հավանությամբ աշխատանքներ են տարվում Մոսկվայում և Վաշինգտոնում դեսպանատների աշխատանքին խանգարող «գրգռիչների վերացման ուղղությամբ»։
«Հանդիպում է եղել Ստամբուլում, այժմ պատրաստվում է երկրորդ հանդիպումը, այդ ընթացքում կապեր են հաստատվում հեռախոսով և տեսակոնֆերանսով»,- ասել է Լավրովը։ Նախարարն ընդգծել է, որ չի ցանկանում կանխատեսումներ անել, սակայն Մոսկվան առաջընթաց է տեսնում շփումներում։ Լավրովի խոսքերով, «ամերիկյան գործընկերների կողմից ցանկություն կա վերացնել դիվանագետների բնականոն աշխատանքի համար այդ խոչընդոտները, որոնք լիովին անընդունելի են դիվանագիտական պրակտիկայի տեսանկյունից»:
ՌԴ ԱԳՆ ղեկավարն ընդգծել է, որ ոչ թե Մոսկվան է սկսել «խոչընդոտել դիվանագետների աշխատանքը», այլ Բարաք Օբամայի վարչակազմը։ Լավրովը հիշեցրել է, որ Ռուսաստանը նման գործողություններին պատասխանել է միայն փոխադարձության օրենքներով, որոնք «ոչ ոք չի չեղարկել» դիվանագիտության մեջ։