Սուտ է. Ջիգարխանյանին ծանր վիճակում հիվանդանոց չեն տեղափոխել. հանգստանում է առողջարանում

Լուրը, թե ԽՍՀՄ ժողովրդական արտիստ Արմեն Ջիգարխանյանին ծանր վիճակում տեղափոխել են հիվադանոց, չի համապատասխանում իրականությանը: Այս մասին «Հայկական ժամանակին» հայտնեց նրա մտերիմ ընկեր Արթուր Սողոմոնյանը: Նա նաեւ տեղեկացրեց, որ հայտնի դերասանը հանգստանում է առողջարանում: «Դա սուտ է: Ցավոք սրտի, ռուսական որոշ լրատվամիջոցներ լուրեր տարածեցին, որ Ջիգարխանյանը հիվանդ է, բայց դա լրիվ սուտ է, նա լրիվ նորմալ է, առողջ է, հիմա հանգստանում է առողջարանում: Խնդրեց 1-2 շաբաթ իրեն ժամանակ տալ, որպեսզի հանգստանա ու վերադառնա գործի»,- ասաց նա: Ռուսական լրատվամիջոցները գրում էին, թե շաքարային դիաբետի պատճառով դերասանի ոտքերը կաթվածահար վիճակում են: Այս տեղեկությունն Արթուր Սողոմոնյանը նույնպես հերքեց: «Ո՛չ, ո՛չ, դա սուտ է: Նա նորմալ է, մենք երկուսով գնացինք առողջարան: Նա իր ոտքով եկավ, ոչ մի խնդիր չունի: Ուղղակի ասաց, որ ցանկանում է մի փոքր հանգստանալ, որովհետեւ վերջին շրջանում մի փոքր շատ էին խառնվում նրա կյանքին, որոշեց 1-2 շաբաթ արձակուրդ վերցնել»,- ասաց նա: Այս շրջանում 82-ամյա Արմեն Ջիգարխանյանի եւ նրա երիտասարդ կնոջ՝ 38-ամյա Վիտալինա Ցիմբալյուկ-Ռոմանովսկայայի ամուսնալուծության գործն ընթացքի մեջ է: Նրանց շուրջ աղմուկ բարձրացավ հոկտեմբերի սկզբին, երբ Վիտալինան հայտարարեց, որ ամուսնուն առեւանգել են: Հետո պարզվեց, որ Ջիգարխանյանը հիվանդանոցում էր: Իրեն լավ էր զգում, կնոջը մեղադրում էր գողության մեջ եւ ապահարզան էր պահանջում: