Մինչեւ տարեվերջ Թալիշ կվերադառնան առաջին ընտանիքները

Մինչեւ տարեվերջ Մարտակերտի շրջանի Թալիշ գյուղում ամբողջությամբ շահագործման կհանձնվի առաջին 17 բնակելի տունը, որտեղ մշտական բնակություն են հաստատելու այն բնակիչները, ովքեր առաջինն են ցանկություն հայտնել վերադառնալ գյուղ: Այս մասին «Արցախպրես»-ի հետ զրույցում ասել է ԱՀ քաղաքաշինության նախարար Կարեն Շահրամանյանը եւ հավելել, որ բացի կապիտալ վերանորոգման աշխատանքներից, որոշ առանձնատներում իրականացվել են կցակառուցման աշխատանքներ: Բոլոր տներում առկա են սանհանգույց, խոհանոց, կահավորված ննջասենյակներ եւ հյուրասենյակներ: ԱՀ քաղաքաշինության նախարարի տեղեկացմամբ՝ շինաշխատանքների հաջորդ փուլով կառուցվելու է եւս 10 տուն, որից 2-ի աշխատանքներն արդեն ընթացքի մեջ են: Բացի բնակելի տներից, այս պահի դրությամբ ավարտին են մոտենում համայնքային բազմաֆունկցիոնալ կենտրոնի վերակառուցման աշխատանքները, որտեղ ընթանում են ներքին եւ արտաքին ներկարարական աշխատանքներ:«Համայնքային կենտրոնի շենքը կունենա համայնքի ղեկավարի աշխատակազմի համար նախատեսված սենյակներ, բուժկետ, երիտասարդների ժամանցի համար խաղասենյակներ: Շենքի հարակից տարածքում կառուցում ենք նաեւ կաթսայատուն, որը ծառայելու է ոչ միայն համայնքային կենտրոնին, այլեւ դպրոցին եւ մանկապարտեզին: Վերակառուցվում է նաեւ գյուղի հանդիսությունների դահլիճը, որը ավերվել էր հրետակոծության հետեւանքով: Շենքի հիմքերն ուժեղացվել են, տանիքի ծածկն իր բոլոր հարդարման աշխատանքներով լրիվությամբ նորացվել է: Ներկայումս այնտեղ եւս շինաշխատանքներն ավարտման փուլում են եւ հիմնականում բարեկարգման աշխատանքներ են իրականացվում: Մինչեւ տարեվերջ նախատեսում ենք շահագործման հանձնել համայնքային կենտրոնի եւ հանդիսությունների դահլիճի շենքերը»,- ասել է Կ. Շահրամանյանը եւ ավելացրել, որ մինչեւ 2018 թվականի սեպտեմբերի 1-ը շահագործման կհանձնվեն նաեւ դպրոցի եւ մանկապարտեզի շենքերը՝ իրենց բոլոր հարմարություններով՝ բարեկարգմամբ, գիշերային լուսավորությամբ եւ խաղահրապարակներով: Կ. Շահրամանյանը նշեց, որ Թալիշում կառուցվող հասարակական նշանակության բոլոր շենքներն ապահովված են ապաստարաններով, որը կարող է ծառայել նաեւ հարեւանությամբ գտնվող տների բնակիչների համար: Բացի պետական միջոցներից, ըստ քաղշին նախարարի, Թալիշի վերակառուցման ծրագրերում ակտիվ մասնակցություն ունի նաեւ «Հայաստան» համահայկական հիմնադրամը: Հիմնադրամի կողմից հատկացվել է շուրջ 900 մլն դրամ: Այդ միջոցներով հնարավոր է դարձել գյուղում շինաշխատանքներն ավելի ինտենսիվ դարձնել: Մարդկանց կենսագործունեության համար ստեղծվում են բոլոր անհրաժեշտ պայմանները, գրեթե ամբողջությամբ վերականգնվել են առկա ենթակառուցվածքները, բարեկարգվում են փողոցները, մայթերը, կապահովվի փողոցների գիշերային լուսավորությունը: