Իշխանության քաղաքականությունն ուղղված է հայոց պետականության հիմնարար հիմքերի խալխլմանը և փաստացի ոչնչացմանը․ Արման Աբովյան

Քաղակական վերլուծաբան Արման Աբովյանը ֆեյսբուքյան իր էջում գրում է․

«Այն գործընթացները, որոնք մենք տեսնում ենք երկրում վերջին երկու օրերին, միանշանակ ցույց են տալիս, որ ներկայիս հայկական իշխանության քաղաքականությունն ուղղված է հայոց պետականության ամենահիմնական, եթե կուզեք ՝ հիմնարար հիմքերի խալխլմանը և փաստացի ոչնչացմանը։

Այսպես, մարտի 26-ին Նիկոլ Փաշինյանը Հայաստանի Ազգային ժողովում (կառավարությանը հարց ու պատասխանի ժամին) ունեցած ելույթի ժամանակ բառացիորեն հայտարարեց, որ «Ղարաբաղյան շարժման» հարցն այլևս որևէ ձևով ներկա չի լինելու երկրի արտաքին և ներքին քաղաքականության մեջ։

Նիկոլ Փաշինյանի հերթական էպատաժի պատճառների մասին կարելի է երկար խոսել , սակայն նույնիսկ իր ողջ հակասությամբ հանդերձ նույն Փաշինյանը չէր կարող չիմանալ, որ Արցախի հարցը ոչ թե այս կամ այն իշխանության կամ քաղաքական ուժի նախաձեռնությունն է, այլ եղել է և միշտ էլ լինելու է Հայաստանի և համայն հայության անցյալի, ներկայի և ապագա գոյության հարցը։

Արցախյան ազգային-ազատագրական շարժումը, որպես ինչ-որ տարածքային «կոնֆլիկտ» ներկայացնելու փորձերը արմատապես սխալ են և իրենից ներկայացնում են մանիպուլյացիա , որը լիովին համապատասխանում է «Հայկական հարցի» վերջնական լուծման թուրք-ադրբեջանական տանդեմի ծրագրերին ՝ հայկական էթնո-քաղաքական էլեմենտը իր Հայրենիքից զրկելու համատեքստում։

Անշուշտ, «ղարաբաղյան հարցը» մոռացության մատնելու փորձերը դատապարտված են ձախողման, սակայն ներկայումս գործող հայկական իշխանության կողմից ազգային առաջնահերթությունների խեղաթյուրման փաստը խոչընդոտում է հանրային համերաշխության ձևավորմանը ՝ հայ հասարակությունում լայն քաղաքացիական երկխոսության ձևավորման համատեքստում։

Հետևաբար մենք բոլորս ուղղակի պարտավոր ենք ճիշտ ընկալել պետական և ազգային առաջնահերթությունները Արցախյան ազատագրական շարժումը ադեկվատ ընկալելու կոնտեքստում»։