Եղնուկյանը կրկին վատացել է, սակայն՝ հրաժարվել բուժօգնություն ստանալուց
Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր՝ նոյեմբերի 23-ին, «Սասնա ծռերի» գործով մեղադրյալ Կարո Եղնուկյանը ներկա չէ: Նախագահող դատավոր Արտուշ Գաբրիելյանը նշեց, որ այսօր Կարո Եղնուկյանի ինքնազգացողությունը կրկին վատացել է եւ նրան հնարավոր չի եղել այդ վիճակում տեղափոխել դատարան: Դատավոր Արտուշ Գաբրիելյանը կողմերին տեղեկացրեց, որ ըստ «Կենտրոն» ՔԿՀ-ի պետի գրության՝ խցում գտնվելու ժամանակ նրա արյան ճնշումը բարձրացել է, շտապօգնություն են հրավիրել: «Շտապօգնության բժիշկն արձանագրել է, որ Եղնուկյանը հրաժարվել է բուժօգնություն ստանալուց եւ դեղ ընդունելուց: Ըստ պետի գրության՝ նրա վիճակը թույլ չի տալիս նիստի մասնակցել, ուտի նրա՝ դատարան տեղոփոխումն անհնար է»,-հայտնեց դատավոր Արտուշ Գաբրիելյանը: Նրա շահերի պաշտպան Տիգրան Հայրապետյանը միջնորդություն ներկայացրեց այսուհետ Կարո Եղնուկյանին առողջական խնդիրների հետ կապված դատարան չտեղափոխելու մասին: Պաշտպաններից Մուշեղ Շուշանյանն էլ նշեց, որ Կարո Եղնուկյանի ինքնազգացողությունը վատանում է հենց դատական նիստերի օրերին եւ նրան այդ վիճակում դատարան տեղափոխելն անմարդկային վերաբերմունք է նրա նկատմամբ. «Դատական նիստերի օրերին եւ հենց դատարան տեղափոխելու հանգամանքի հետ կապված նրա ինքնազգացողությունը վատանում է եւ դա անմարդկային դրսեւորում է նրա նկատմամբ: Այդ պատճառով նրան պետք է ազատել դատական նիստերին ներկա գտնվելու պարտավորությունից»:
Հետևեք մեզ Viber-ում
