Կուտակել բուֆերներ` վատ օրերի համար.Ֆիննախի կողմից երկար քննարկված հարցին՝լուծում
Հայաստանի կառավարությունը մեղմացնում է պետական պարտքին առնչվող օրենսդրությունը:
ՀՀ կառավարության ներթական նիստում ՀՀ ֆինանսների նախարար Վարդան Արամյանը ներկայացրել «ՀՀ բյուջետային համակարգի մասին» եւ «Պետական պարտքի մասին» օրենքներում փոփոխությունների նախագիծը, որը ենթադրում է փոխել պետական պարտքի վերաբերյալ գործող դրույթը, ըստ որի, եթե պետական պարտքը գերազանցում է ՀՆԱ 60 տոկոսը, ապա պարտքն առ ոչինչ է:
«Սա երկար քննարկված հարց է, մենք մի քանի օրենքներում փոփոխություններ ենք առաջարկում, խոսքը գնում է հարկաբյուջետային նոր կանոնների մասին», - ասաց Վ. Արմայանը:
Նա հիշեցրեց, որ այս տարվա հունիս ամսին ունեցել են տեխնիկական օժանդակություն Արժույթի միջազգային հիմնադրամից:
Վարդան Արամյանը նշեց, թե հիմնական խնդիրը կայանում է նրանում, որ հարկաբյուջետային կանոնների մասով գործող իրավակարգավորումները բավականին կոշտ են:
«Այսօր մենք ունենք հետեւյալ նորմերը՝ պետական պարտքի մասին օրենքով ասվում է, որ եթե 50 տոկոս գերազանցում ես պետական պարտքը, ապա հաջորդ տարին դու պետք է ծրագրավորես նախորդ երեք տարիների միջին ՀՆԱ-ի 3 տոկոսից ոչ ավելի պակասուրդ եւ 60 տոկոսի գերազանցման դեպքում պարտքն առ ոչինչ է. Սա խիստ կոշտ մոտեցում է: Մենք նշել ենք երեք շեմ՝ 40, 50 եւ 60 տոկոս, եթե պարտքը 40 տոկոսից ավելի է, պետք է աշխատի այն նորմը, որ քո կապիտալ ծախսերը պետք է ավելի լինեմ, քան պակասուրդը, եթե 50–ից ավելի է, ապա կոշտացնում ես պայմանները, կանոն ես դնում ընթացիկ ծախսերի աճի վրա, իսկ եթե 60 տոկոսից գերազանցում է ՝ ավելի կոշտացնում ես, որ ընթացիկ ծախսերը կապես նաեւ միջին եկամուտների հետ», - ասաց նա:
«Տնտեսական բլոկի նախարարներին հարցեր չկա՞ն, ազատության աստիճանը չի սահմանափակվո՞ւմ», - հետաքրքրվեց վարչապետ Կարեն Կարապետյանը:
«Հակառակը, պարոն վարչապետ, այս կանոնների ամենակարևոր հմայքն այն է, որ, անկախ նրանից, թե ով կլինի, կանոնով պետք է աշխատի հարկաբյուջետային քաղաքականությամբ, սա է հիմնական փիլիսոփայությունը», - արձագանքեց Վարդան Արամյանը:
Հետևեք մեզ Viber-ում
