«Գոնե Վիքիպեդիա կարդացեք». Մանուկյանը հորդորեց Նիկոլ Փաշինյանին կրթվել

Դեռ 1921 թվականին Ստալինը, հետո Բաղիրովը, Բերիա, Նուրիջանյանն էին ասում, որ ասում Ղարաբաղյան շարժում չպետք է լինի։ Հետո Սուսլովն էր ասում, Գևորգովն էր ասում չպետք է լինի, բայց Ղարաբաղյան շարժումը կա։ Այս մասին ԱԺ-ում կատավարության հետ հարցուպատասխանի ընթացքում ասաց «Հայաստան» խմբակցության պատգամավոր Գեղամ Մանուկյանն՝ անդրադառնալով Փաշինյանի պնդմանը, թե Ղարաբաղյան շարժում չպետք է լինի։

Նա հորդորեց Նիկոլ Փաշինյանին կրթվել, քանի որ վերջին հարցազրույցում Մինսկի խմբի վերաբերյալ անդրադարձում նշել է, որ Մինսկի խումբը ձևավորվել է Ադրբեջանի տարածքում կոնֆլիկտի լուծման համար։ «Գոնե Վիքիպեդիա կարդացեք»,-ասաց Մանուկյանը։

Ի պատասխան՝ Նիկոլ Փաշինյանը հայտարարեց, որ իր կյանքում առաջին ցույցին մասնակցել է 1988 թվականին։ «Ես այդ ժամանակ եղել եմ յոթերորդ կամ ութերորդ դասարանում։ Հա, ի՞նչ, այդ ուղերձները, որ մեջբերում եք՝ ինչի՞ համար եք մեջբերում։ Հենց դրա մասին է խոսքը, բա հենց դրա ապացույցն է։ Այնպես չէ, որ մենք ուրիշ միջավայրից եկել ենք և ուրիշ բան ենք ասում։ Դա մեր անցած ճանապարհն է, ու մենք պիտի մի հատ հետ նայենք, վերլուծենք։ Դա էլ է կրթության մաս։
Ես ուրիշներին կոչ չեմ անում կրթության, ես ինքս ինձ եմ կոչ անում կրթության և իմ կրթության արդյունքներն եմ ձեզ ներկայացնում, այդ թվում՝ այս հարցերի արձանագրման համատեքստում։

Եթե ձեզ համար կրթությունը կարևոր լիներ, ինչո՞ւ ենք մենք այսօր ընկել դպրոց ու մանկապարտեզ կառուցելու մասին խոսում։ Երկրում տասնյակ դպրոցներ, հարյուրավոր դպրոցներ մարզադահլիճ չունեն, որ երեխեքը բան ֆիզկուլտուրա անեն։ Բա դրա համար սերունդի կեսը ինչքան հիվանդությունների ցանկ կա՝ ունեն։ Հո Ղարաբաղի մասին գոռալով չի։ Այո, մենք չենք շարունակելու Ղարաբաղի շարժումը, ուզում եք թռեք վերև, ուզում եք իջեք ցած։ Դա ՀՀ-ի պաշտոնական դիրքորոշումն է, եթե հայ ժողովուրդը համաձայն չի այդ դիրքորոշման հետ՝ ես ինչ որ պահի կդադարեմ լինել ՀՀ վարչապետ, դուք կդառնաք ՀՀ վարչապետ»,-ասաց նա։