Գյումրին ընտրության հնարավորություն ունի. «Մայր Հայաստանի» առաջարկը
Գյումրու ավագանու արտահերթ ընտրության քարոզչության փուլը մոտենում է ավարտին: Արդեն կարելի է որոշ գնահատականներ տալ թեկնածուների, նրանց ծրագրերի և քաղաքական ուժերի հնարավորությունների մասին:
Քարոզարշավի հենց սկզբից պարզ էր, որ մրցակցությունը սուր է լինելու: Կան ընդգծված առաջատարներ՝ Կարեն Սիմոնյան, Վարդան Ղուկասյան և Սարիկ Մինասյան: Վերջինս առաջատարների թվում է հայտնվել բացառապես իշխանական լծակների օգնությամբ, այլապես անցողիկ շեմը հաղթահարելու խնդիր կունենար:
Իշխանական ցայտնոտ
«Քաղաքացիական պայմանագիրը», ինչպես սպասվում էր, ամբողջությամբ կիրառեց վարչական ռեսուրսը: Նաև դիմեց «սև» քարոզչության գործիքին, որը հիմնական բումերանգի էֆեկտ ունեցավ և աշխատեց իր դեմ:
Ուշագրավն այն է, որ «Քաղաքացիական պայմանագիրը» փորձում էր չերևալ և ընտրությունը իջեցնել ԺԷԿ-ի պետ ընտրելու մակարդակին: Իրենք շատ լավ գիտեն, որ ՔՊԿ-ն հակակրանք է առաջացնում գյումրեցիների մոտ: Դա էր պատճառը, որ Նիկոլ Փաշինյանը խուսափեց ընտրապայքարի մեջ մտնելուց: Բայց որքան էլ փորձեցին քողարկել ՔՊ-ին, միևնույն է գյումրեցիները շատ լավ գիտեն, թե ով ով է:
Ինչ վերաբերում է ՔՊ-ի արբանյակ թեկնածուներին, ապա նրանք մնացին ստվերում ու միայն իշխանական միջամտությամբ կարող են հաղթահարել անցողիկ շեմը:
ՔՊ-ում հասկանում են, որ միայնակ և իրենց «արբանյակի» հետ չեն կարողանալու մեծամասնություն վերցնել: Դրա համար էլ ցայտնոտի մեջ են և նյարդային շարժումներ են անում՝ հույսները դնելով այլ բաների վրա:
«Մայր Հայաստանը»՝ այլընտրանք
Ընդդիմադիր դաշտի թեկնածուները համեմատաբար շատ են, բայց աչքի են ընկնում երկուսը՝ Գյումրու նախկին քաղաքապետը և «Մայր Հայաստան» դաշինքի քաղաքապետի թեկնածու Կարեն Սիմոնյանը:
Նկատենք, որ «Մայր Հայաստանն» ընտրարշավում աչքի ընկավ ծրագրով, որը միակն է Գյումրու հեռանկարային զարգացման առումով: Դա ազատ տնտեսական գոտու ներդրման նախագիծն է, որը նաև հավանության է արժանացել Ռուսաստանի Դաշնության պետական, փորձագիտական և բիզնես շրջանակների կողմից, ինչը հիմք է տալիս ենթադրելու, որ ծրագիրը լուրջ աջակցություն ունի և կյանքի է կոչվելու: «Մայր Հայաստանի» առաջնորդ Անդրանիկ Թևանյանի արտաքին կապերը տվյալ դեպքում կարող են արդյունավետ և օգտակար լինել Գյումրու համար:
«Մայր Հայաստանն», ի դեմս Կարեն Սիմոնյանի և դաշինքի Գյումրու թիմի, գյումրեցիների համար իրական այլընտրանք է ոչ միայն ընդդեմ իշխանությունների, այլ նաև ընդդիմադիր դաշտում: Գյումրեցիներն ունեն ընտրության հնարավորություն:
«Մայր Հայաստանն» առաջարկում է քաղաքապետի թեկնածու Կարեն Սիմոնյանին, ով հաջողակ գործարար է, ունի ընդդիմադիր հայացքներ, կազմակերպչական բարձր կարողություններ և կառավարման հմտություններ:
Կարեն Սիմոնյանի քաղաքապետ դառնալու պարագայում «Մայր Հայաստանն» ամբողջությամբ ստանձնելու է նրա գործունեության քաղաքական պատասխանատվությունը, ինչը շատ կարևոր հանգամանք է, քանի որ առանց քաղաքական պատասխանատվության ցանկացած ընդդիմադիր քաղաքապետ կարող է խոցելի դառնալ ու հեշտությամբ հետապնդվել իշխանությունների կողմից: «Բալասանյան» դաշինքին Նիկոլ Փաշինյանը կարողացավ ճնշել, քանի որ չկար քաղաքական պաշտպանվածություն: «Մայր Հայաստանի» թեկնածուի պարագան այլ է: «Մայր Հայաստանն» իր դեմքով է հանդես գալիս, չի թաքվնում այլ անվանումների տակ և որպես օրվա իշխանության գաղափարական, արմատական ընդդիմախոս ճնշումների դեպքում հակազդեցության բազմաթիվ գործիքներ ունի: Իշխանական ճնշումներին կտրվի քաղաքական քաղաքական պատասխան և՛ տեղական, և՛ համապետական մասշտաբով: Այնպես որ գյումրեցիները Կարեն Սիմոնյանի գլխավորած թիմին ընտրելով՝ կիմնան, թե որ ուժի հետ գործ ունեն և ումից պետք է պահանջեն:
Թե ինչ որոշում կկայացնեն գյումրեցիները մարտի 30-ին, դրանից էլ կախված կլինի հանրապետության երկրորդ քաղաքի և ամբողջ Հայաստանի զարգացման հետագա ընթացքը:
Հ.Գ. Նիկոլ Փաշինյանը Գյումրիի ընտրություններում մի քանի խնդիր է ուզում լուծել, որոնցից մեկն, ըստ տարածված լուրերի, Սարիկ Մինասյանի դեմքով «Քաղաքացիական պայմանագրի» վերարտադրությունն է, որից հետո տեղի կունենա նրա հեռացումը և Գյումրիի քաղաքապետ կնշանակվի Աննա Հակոբյանի բարեկամը, որը հանգրվանել է ՔՊ-ի ցուցակի երկրորդ հորիզոնականում: Այսինքն՝ Սարիկ Մինասյանն ընդամենն օգտագործվում է, որպեսզի Նիկոլն ու իր կինը շարունակեն խնամի-ծանոթ-բարեկամ սկզբունքով կառավարումը: Նաև այս ամենը մերժելու համար է պետք թույլ չտալ ՔՊ-ի վերարտադրությունը:
Հետևեք մեզ Viber-ում
