Հայաստանի ֆուտբոլի ազգային հավաքականում բարոյահոգեբանական մթնոլորտը շատ վատ վիճակում է ․ Վանեցյան

Նիկոլ Փաշինյանն անվերջ պարտությունների սիմվոլ է, քանի դեռ կա Նիկոլ Փաշինյանը, Հայաստանը որևէ հաջողություն որևէ տեղ չի ունենալու։ Այս մասին 24News-ի «Հետագիծ Նարեկ Գալստյանի հետ» հաղորդաշարի եթերում հայտարարել է «Հայրենիք» կուսակցության ղեկավար, ԱԱԾ նախկին տնօրեն, ՀՖՖ նախկին նախագահ Արթուր Վանեցյանը՝ խոսելով Հայաստանի ֆուտբոլի ազգային հավաքականի վերջին խայտառակ պարտություններից։

«Մեղավորներից մեկն ինքն է, ֆեդերացիայում ստեղծվել է մի իրավիճակ, որը չի արտացոլում իրական պատկերը, թե ինչ են ուզում ֆուտբոլիստներն ու ֆուտբոլասերները։ Մենք տեսնում ենք, որ ֆան ակումբներն ու ֆուտբոլով հետաքրքրված մարդիկ պահանջում են ֆեդերացիայի նախագահի հրաժարականը՝ զրո արձագանք»,- նշել է Վանեցյանը՝ հիշեցնելով, թե ինչ պայմաններում տեղի ունեցավ իր հրաժարականը, երբ ինքն էր ՀՖՖ նախագահը․«Երբ քաղաքականությունը խառնվեց ֆուտբոլին, որպեսզի ես ֆուտբոլին չվնասեմ, որոշում կայացրեցի և ինքնակամ հեռացա Ֆուտբոլի ֆեդերացիայի նախագահի պաշտոնից, ՀՖՖ նախագահին հեռացնելու տարբերակ իշխանությունները չունեին, նրանք պետք է վնաս տային ֆուտբոլին, որն ինձ համար անընդունելի էր» ։

Նա նշել է, որ Հայաստանի հավաքականում բարոյահոգեբանական մթնոլորտը շատ վատ վիճակում է, ֆուտբոլիստները տարբեր խմբերի են բաժանված, չկա թիմային խաղ, մինչդեռ, ֆուտբոլը թիմային խաղ է։ Նրա խոսքով՝ թիմում լավ ֆուտբոլիստներ կան, բայց չկա Հենրիխ Մխիթարյանը, ով, բացի նրանից, որ շատ բարձրակարգ ֆուտբոլիստ է, նաև ունի առաջնորդի հատկություններ, անվերապահ հեղինակություն։