Թուրքիայում ցույցերի ժամանակ 1133 մարդ է ձերբակալվել

Կոռուպցիայի և ահաբեկչության համար մեղադրվող Ստամբուլի քաղաքապետի կալանավորման դեմ բողոքի ցույցերի ընթացքում ձերբակալվել է 1133 անձ։

Այս մասին սոցիալական ցանցերում հրապարակում է տարածել Թուրքիայի ներքին գործերի նախարար Ալի Երլիքայան։

«Մեր ոստիկաններից 123-ը վիրավորվել են ցույցերի ժամանակ։ Բողոքի ակցիաների ընթացքում առգրավվել են ծծմբային թթու, քարեր, փայտեր, հրավառ նյութեր, մոլոտովի կոկտեյլներ, կացիններ և դանակներ։ Շարունակվում են դատական ​​գործերը նրանց նկատմամբ, որոնք հարձակվել են ոստիկանների վրա, վնասել են հանրային գույքը և սպառնացել մեր ժողովրդի անվտանգությանը։ 2025 թվականի մարտի 19-ից մարտի 23-ը բերման է ենթարկվել ապօրինի գործողություններ կատարելու մեջ կասկածվող 1133 անձ։

Բերման ենթարկվածների թվում հայտնաբերվել են 12 տարբեր ահաբեկչական կազմակերպությունների հետ կապ ունեցող անձինք»,-գրել է նախարարը։

Հիշեցնենք, Ստամբուլի քաղաքապետ Էքրեմ Իմամօղլուն նախագահ Ռեջեփ Թայիփ Էրդողանի գլխավոր մրցակիցն է։ Մինչ կալանավորումը քաղաքապետին զրկել էին նաև դիպլոմից։