«Կրոկուսից» ահաբեկիչների փախուստի նոր մանրամասներ են պարզվել

Crocus City Hall-ում անցյալ տարվա ահաբեկչությունից փրկված երկուսը՝ Եվգենիան և նրա ամուսինը, ովքեր եկել էին Piknik խմբի համերգին, Lenta.ru-ի հետ զրույցում բացահայտել են ահաբեկիչների փախուստի նոր մանրամասներ։

Ռուս կինը պատմել է, որ ինքն ու ամուսինը թաքնվել են VIP սրահում, երբ ահաբեկիչները սկսել են կրակել դահլիճում գտնվող մարդկանց վրա։ Հրդեհը բռնկվելուց հետո ամուսինները որոշել են վազել դեպի մուտքը, որտեղից եկել են։ Դուռը փակ է եղել, բայց կարողացել են կոտրել այն։ Այնուհետև ամուսինները բախվել են հենց ահաբեկիչներին, որոնք չեն արձագանքել նրանց և, ըստ երևույթին, շտապել են դուրս գալ դահլիճից՝ խառնվելով ամբոխին։

«Դահլիճում դիակներ կային։ Վազեցինք դեպի ելքը, ամուսինս նկատեց մարդկանց պաշտպանիչ ժիլետներով, բայց ուշադրություն չդարձրեց»,- նշել է Եվգենիան։

Փողոցում ամուսինները թաքնվել են մասնավոր պահնորդական ընկերության մեքենայի հետևում, իսկ հետո կարողացել են հասնել իրենց մեքենային։

«Երբ մենք անցնում էինք ճանապարհով, մի սպիտակ մեքենա անցավ: Այդ ժամանակ մտածում էինք, որ մարդիկ խուճապահար հեռանում են այդ վայրից։ Ինչպես հետո պարզվեց, նրանք ահաբեկիչներ էին։ Մենք դուրս եկանք, և նրանք մեզ հետ միասին դուրս եկան», - ավելացրել է ռուս կինը: