Թորոսյանի գրառումը ցնծությամբ են ընդունել ադրբեջանցիները և թուրքերը

ԱԺ ՔՊ–ական ատգամավոր Արսեն Թորոսյանն Ամերիկայի Հայ դատի հանձնախմբին (ANCA) մեղադրել է Մոսկվայի հետ աշխատելու և Ռուսաստանի շահերը սպասարկելու մեջ։ X սոցցանցում նրա կատարած հրապարակումը լայն արձագանք է գտել ադրբեջանցիների, թուրքերի և նրանց լոբբիստների շրջանակում, ովքեր կիսվում են գրառմամբ և նշում, թե Թորոսյանը հաստատում է իրենց մեղադրանքները ANCA–ի հասցեին։

ՔՊ–ական պատգամավորը, մասնավորապես, գրել է․

«Մեր ազգը պետք է ճանաչի իր «հերոսներին»։

Վաշինգտոնում գործում է հայ լոբբիստների խումբ, որը հայտնի է որպես Ամերիկայի Հայ դատի հանձնախումբ, ովքեր իրականում ԱՄՆ-ի Հայ Յեղափոխական Դաշնակցության (ՀՅԴ) կամ Դաշնակցության մասնաճյուղն են։ Այս տղաների հիմնական նպատակը միշտ եղել է Հայաստանի ինքնիշխանությունն ու անկախությունը նվազեցնելը և արդարացնելը, որ մենք չենք կարող ապրել առանց Ռուսաստանի։ Սա նրանց աշխատանքի ամենահեգնական հատվածն է. հիմնված լինելով Վաշինգտոնում՝ նրանք լոբբինգ են անում Մոսկվայի համար: Այս ամենն արվում է հայրենասիրության, ազգայնականության, հայապահպանության և այլն սոուսով»։

Այսպես, Հադսոնի հետազոտական ինստիտուտից ադրբեջանամետ վերլուծաբան Մայքլ Դորանը կիսվել է Թորոսյանի գրառմամբ և նշել․ «Հայկական հպարտ ձայները հիմա բացատրում են սա՝ ճշմարտությունը։ Հայաստանի վարչապետ Նիկոլ Փաշինյանը շատ մոտ էր նույն միտքն ասելուն. ԱՄՆ հայկական լոբբին ղեկավարում են դաշնակցականները՝ ծայրահեղ ազգայնականներ, ովքեր դեմ են խաղաղությանը և քարոզում են ռուսական և իրանական քարոզչական գծերը»:

«Նրանք (ANCA–ն) հայ կամ ամերիկացի հայրենասերներ չեն, այլ Իրանի և Ռուսաստանի հետ միավորված շահերի խումբ»,– մեկնաբանություններում գրել է թուրք օգտատերը։

«Շնորհավորում եմ այս խիզախ թվիթի համար»,– մեկնաբանել է ադրբեջանամետ ֆրանսիացի քաղաքագետ Մաքսիմ Գոենը:

«ANCA-ն սպասարկում է միայն ANCA-ի շահերը, ոչ թե Հայաստանի։ Հարավային Կովկասում տարածաշրջանային մերձեցման ժամանակն է»,– Թորոսյանի գրառման մեկնաբանությունների բաժնում գրել է թուրք իշխանամետ լրագրող Յուսուֆ Էրիմը։