«Զվեզդա»-ի ոչ կոռեկտ գնահատականները չեն բխում դաշնակցային հարաբերություններից. Շարմազանով
Ռուսաստանյան «Զվեզդա» հեռուստաընկերության ղեկավարությունը պաշտոնական նամակով դիմել է հայկական կողմին,նոյեմբերի 21-ին ՀՀԿ ԳՄ նիստից հետո լրագրողների հետ զրույցում ասել է ԱԺ փոխնախագահ Էդուարդ Շարմազանովը։ «Մեր գնահատականը հետևյալն է, այդ հեռուստաեթերի ընթացքում հնչած ոչ կոռեկտ գնահատականները չեն բխում հայ-ռուսական դաշնակցային հարաբերություններից։Դրանք հարիր չեն, մեր խողովակներով պետությունը դիրքորոշումը հայտնել է»,-նշեց Շարմազանովը։ Ինչ վերաբերում է Նժդեհին, նա հայտարարել է, որ անկախ այն բանից՝ ով ինչպիսի որակումներ կտա, Նժդեհը մեր ազգի մեծագույն հերոսներից մեկն է: «Շնորհիվ Նժդեհի, մենք ունենք նաեւ անկախ Սյունիք, ունենք հերոսացած Լոռու Ղարաքիլիսայի ժողովուրդ, որը փառապանծ հաղթանակ տոնեց Ղարաքիլիսայի հերոսամարտում, ինչի արդյունքում մենք կարողացանք նաեւ ապահովել Սարդարապատի թիկունքը 1918 թվականի մայիսյան հերոսամարտի ժամանակ: Նժդեհը հայ ժողովրդի մեծագույն հերոսներից մեկն է եւ ունի այն նշանակությունը, ինչ բարեկամ ռուս ժողովրդի համար Ալեքսանդր Սուվորովը»,- հավելել է Շարմազանովը:
Հետևեք մեզ Viber-ում
