Էջմիածնի բնակիչները կրակն են ընկել թե հների, թե նորերի ձեռքը. Հարություն Մկրտչյան

Փաստորեն ՀՀ քաղաքացիները , առավելեւս իմ ծննդավայր Էջմիածնի բնակիչները կրակն են ընկել թե հների, թե նորերի ձեռքը: Այս մասին իր ֆեյսբուքյան էջում գրել է Հարություն Մկրտչյանը:

«Մանվելին ու քաղաքապետ որդուն հեղափոխության ալիքի տակ գահընկեց արեցին,որ գոնե նորմալ միջավայրում ապրեն, բայց ստացան նույն վիճակը`ընտանեկան ստվերային կառավարում, կոռուպցիաների շղթա, չփոփոխվող կիսաքրեական, բարձիթողի մթնոլորտ, հետն էլ մի քանի բոնուս` օրինակ թափառող ու ագրեսիվ անհաշվելի շներ, մաքրել ու զարդարել քաղաքը տոնից տոն` էն էլ միայն կենտրոնը ( օրինակները բազմաթիվ են )...

Վաղարշապատ համայնքը գրեթե 46 հազարանոց համայնք է, որտեղ ներկայիս քաղաքապետը ստացել է ընդամենը 5 հազար (+-) ձայն, այն է` ունի բավականին խնդրահարույց քաղաքական լեգիտիմություն (թեկուզ եւ իրավական տեսակետից ընտրված համայնքապետ է), բայց դա էլ չի կասեցնում այն, ինչ տեղի է ունենում , որովհետեւ բոլոր բանական մարդիկ էլ ընդամենը 300 000 ՀՀ դրամ տուգանքից «ընկրկելով» հաստատ իրենց ամրապնդված վարքագիծը էլ չէին փոխելու:

Հանուն արդարության ասեմ, որ Վաղարշապատ համայնքի վերջին ընտրությունների ընթացքում ես էլ պիտի ոչ ոքի չսատարեի, որովհետեւ ընթացքում է բացահայտվում, թե հայրենասիրության թոզ-դումանի ու կեղծ քողի տակ ինչ փտած արժեհամակարգով մարդիկ կարող են իրականում թաքնվել ու որ գրպանային ավագանիներին էլ,ընտրվողին էլ մի բան էլ դու ես լեգիտիմացնում, երբ նման տոքսիկ շրջապատում գոնե թե մեկին ուզում ես մի քիչ վստահել։

Միով բանիվ` մյուս ընտրություններին թող բոլորը իմացած լինեն, որ խոշորացույցով եմ նայելու ԲՈԼՈՐ թեկնածուներին ու ոչ ոք տոլերանտության թող չսպասի, եթե ազնիվ չէ իր համաքաղաքացու, համերկրացու ու երկրի հանդեպ։

Հանրային պաշտոնը որբի գլուխ չի , որ ում ասես մաշինկա տանք, ասենք` բարով խուզես ...

Հուսով եմ` ՔՊ-ում` «ինքնաքննադատություն» շարքի նիստերի ընթացքում էս հարցը գոնե թե կքննարկեն...»:

Հարություն Մկրտչյանը գրառմանը կցել է նաև հոդվածը, ըստ որի` Էջմիածնի քաղաքապետ Դիանա Գասպարյանը 13.6 միլիոն դրամի պայմանագիր է կնքել սկեսրայրի հետ: